qaraqalpaqistandiki weqelerge chétishliq bir türküm kishiler nazaret astigha élindi

türkiye awazi radiyosi xewiri: özbékistan bash teptish mehkimisi bayanat élan qilip, özbékistan asasiy qanununidiki qaraqalpaqistan aptonom jumhuriyitining salahiyitige munasiwetlik maddilargha özgertish kirgüzüsh toghrisidiki bezi teklipler küntertipige kelgendin kéyin, qaraqalpaqistan paytexti kukusta bashlinip, kéyinche qanunsiz heriketlerge aylinip ketken weqelerge chétishliq 14 kishining asasiy qanunluq tertip - intizamni buzushqa urunush bilen eyiblinip nazaret astigha élinghanliqini uqturdi.

nazaret astigha élinghanlarning ichide bu namayishni teshkilligüchilerdin dewletmurat tajimiradow we azamat turdanow qatarliqlarning barliqigha isharet qilinghan bayanatta, mezkur weqelerge munasiwetlik deslepki tekshürüshlerning élip bériliwatqanliqigha dair uchurlargha orun bérildi.

özbékistan asasiy qanunidiki qaraqalpaqstan aptonom jumhuriyitining siyasiy salahiyitige munasiwetlik maddilargha özgertish kirgüzüsh toghrisidiki bezi tekliplerning küntertipige kélishi bilen, 7 - ayning 1 -, 2 - künliri qaraqalpaqstanda namayishlar ötküzülgenidi.

özbékistan ichki ishlar ministirliqi, mezkur namayishlarni özbékistan asasiy qanunigha kirgüzülüshi pilanlanghan özgertishlerni «xata analiz qilghan» bir türküm kishilerning ötküzgenlikini bildürgenidi.

weqedin kéyin özbékistan pirézidénti shewket mirziyayéw, namayishlar dawam qiliwatqan nukusqa bérip, xelq bilen körüshüp, qaraqalpaqstanning salahiyitining özgertilmeydighanliqini jakarlighanidi.

namayishlarning üzlüksiz dawamlishishidin kéyin pirézidént mirziyayéw perman chüshürüp, qaraqalpaqistan aptonom jumhuriyitide 2 - awghustqiche jiddiy halet élan qilghanidi.

özbékistan bash teptish mehkimisi, weqelerde töt nepiri saqchi bolup 18 kishining qaza qilghanliqini, 38 nepiri bixeterlik xadimi bolup jemiy 243 kishining yarilanghanliqini uqturghanidi.