қарақалпақистандики вәқәләргә четишлиқ бир түркүм кишиләр назарәт астиға елинди

түркийә авази радийоси хәвири: өзбекистан баш тәптиш мәһкимиси байанат елан қилип, өзбекистан асасий қанунунидики қарақалпақистан аптоном җумһурийитиниң салаһийитигә мунасивәтлик маддиларға өзгәртиш киргүзүш тоғрисидики бәзи тәклипләр күнтәртипигә кәлгәндин кейин, қарақалпақистан пайтәхти кукуста башлинип, кейинчә қанунсиз һәрикәтләргә айлинип кәткән вәқәләргә четишлиқ 14 кишиниң асасий қанунлуқ тәртип - интизамни бузушқа урунуш билән әйиблинип назарәт астиға елинғанлиқини уқтурди.

назарәт астиға елинғанларниң ичидә бу намайишни тәшкиллигүчиләрдин дәвләтмурат таҗимирадов вә азамат турданов қатарлиқларниң барлиқиға ишарәт қилинған байанатта, мәзкур вәқәләргә мунасивәтлик дәсләпки тәкшүрүшләрниң елип бериливатқанлиқиға даир учурларға орун берилди.

өзбекистан асасий қанунидики қарақалпақстан аптоном җумһурийитиниң сийасий салаһийитигә мунасивәтлик маддиларға өзгәртиш киргүзүш тоғрисидики бәзи тәклипләрниң күнтәртипигә келиши билән, 7 - айниң 1 -, 2 - күнлири қарақалпақстанда намайишлар өткүзүлгәниди.

өзбекистан ички ишлар министирлиқи, мәзкур намайишларни өзбекистан асасий қануниға киргүзүлүши пиланланған өзгәртишләрни «хата анализ қилған» бир түркүм кишиләрниң өткүзгәнликини билдүргәниди.

вәқәдин кейин өзбекистан пирезиденти шәвкәт мирзийайев, намайишлар давам қиливатқан нукусқа берип, хәлқ билән көрүшүп, қарақалпақстанниң салаһийитиниң өзгәртилмәйдиғанлиқини җакарлиғаниди.

намайишларниң үзлүксиз давамлишишидин кейин пирезидент мирзийайев пәрман чүшүрүп, қарақалпақистан аптоном җумһурийитидә 2 - авғустқичә җиддий һаләт елан қилғаниди.

өзбекистан баш тәптиш мәһкимиси, вәқәләрдә төт нәпири сақчи болуп 18 кишиниң қаза қилғанлиқини, 38 нәпири бихәтәрлик хадими болуп җәмий 243 кишиниң йариланғанлиқини уқтурғаниди.