қазақистан пирезиденти қасим җомәрт тоқайев әли һаманий билән көрүшти
иранда рәсмий зийарәттә болуватқан қазақистан пирезиденти қасим җомәрт тоқайев вә һәмраһлиқидики һәйәт иранниң диний рәһбири әли һаманий билән көрүшти.
түркийә авази радийоси хәвири: иран рәсмий агентлиқи «IRNA» ниң хәвиригә асасланғанда, пайтәхт теһранда өткүзүлгән учришишта, һаманий билән тоқайев икки дөләт мунасивәтлири вә район характерлиқ мәсилиләрни музакириләшкән. музакиригә пирезидент ибраһим рийсиму қатнашқан.
һаманий иран билән қазақистан оттурисидики тарихий вә мәдәний мунасивәтләргә диққәтни тартип, икки дөләт оттурисидики һәмкарлиқини райондики һәр қайси саһәләрдә йәниму тәрәққий қилдуруш керәкликини билдүрди. сийасий вә иқтисадий мәсилиләрдики мунасивәтләрни илгири сүрүш үчүн өзара маслишишқа чақириқ қилип, бирләшмә комитетни сәпәрвәр қилишниң лазимлиқини тәкитлиди.
әли һаманий йәнә 24-февралда русийә уруш башлиған украина мәсилиси үстидиму тохтилип, буниңдики асаслиқ мәсилә ғәрбликләрниң шималий атлантик әһди тәшкилатини кеңәйтишкә вә мумкин болған һәммила йәрдә тәсир күчини ашурушқа урунушлири икәнликини ейтти.
қазақистан пирезиденти тоқайев рәисий билән наһайити йахши музакириләрни елип барғанлиқини вә икки тәрәп имзалиған һөҗҗәтләрниң иран - қазақистан мунасивәтлириниң техиму тәрәққий қилишиға йол ачидиғанлиқини ейтти.
тоқайев иран билән қазақистанниң тарихий вә мәдәнийәт җәһәттики охшашлиқи үстидә тохтилип, һаманийниң ислам пәйласопи фараби тоғрисида илмий комитет қуруш тәклипини қарши алидиғанлиқини билдүрди.
тоқайев район характерлиқ мәсилиләр үстидиму тохтилип, 1-айдики нәтиҗисиз сийасий өзгүрүш урунишидин кейинки қазақистанниң әһвали һәққидә мәлумат бәрди.
қазақистан пирезиденти тоқайев түнүгүн иран пирезиденти рәийси билән көрүшкән, андин икки дөләтниң министирлири һәр қайси саһәләрдә 9 келишимнамә имзалиған иди.
