قازاقىستاندا خەلق ھازىرقى ئاساسىي قانۇنغا تۈزىتىش كىرگۈزۈشكە قوشۇلدى

تۈركىيە ئاۋازى رادىيوسى خەۋىرى: قازاقىستان مەركىزى سايلام كومىتېتى تۈنۈگۈن (2022-يىلى 5-ئىيۇن) پۈتكۈل مەملىكەتتە ئۆتكۈزۈلگەن ئاساسىي قانۇنغا ئۆزگەرتىش كىرگۈزۈش رېفېراندۇمىنىڭ دەسلەپكى نەتىجىسىنى ئېلان قىلدى.

بۇنىڭغا ئاساسلانغاندا، 19 مىليون نوپۇسى بولغان قازاقىستاندا تىزىمغا ئالدۇرغان 11 مىليون 734 مىڭ 642 سايلىغۇچىنىڭ تەخمىنەن 8 مىليونى (%68) بېلەت تاشلاشقا قاتناشقان بولۇپ، <قازاقىستان جۇمھۇرىيىتى ئاساسىي قانۇنىغا تۈزىتىش كىرگۈزۈش ۋە قوشۇمچە قىلىنىشىنى قوبۇل قىلامسىز؟>  دېگەن سوئالغا جاۋاب بېرىش ئۈچۈن بېلەت تاشلىغان.

بېلەت تاشلىغان سايلىغۇچىلارنىڭ %77.18 ى «ھەئە»، %18.66 ى «ياق» دەپ جاۋاب قايتۇرغان.

رېفېراندۇمدا قوللىغۇچىلار كۆپ سانلىقنى تەشكىل قىلغان تەقدىردە، ھازىرقى 1995-يىلى قوبۇل قىلىنغان ئاساسىي قانۇننىڭ 33 ئاساسىي ماددىسىغا ئۆزگەرتىش كىرگۈزۈزش ۋە بۇ يىل 1-ئاينىڭ بېشىدا يۈزبەرگەن كەڭ كۆلەملىك ۋەقەلەردىن كېيىن، دۆلەتنىڭ مەمۇرىي تۈزۈمىنى قايتا تۈزۈشنىڭ نىشان قىلىنغانلىقى بىلدۈرۈلگەن ئىدى.