türk döletliri teshkilati qazaqistandiki weqeler toghrisida bayanat élan qildi

türkiye awazi radiyosi xewiri: türk döletliri teshkilati bayanat élan qilip: «türk döletliri teshkilatigha eza döletler bolush süpitimiz bilen, qazaqistanda dawamlishiwatqan weqelerde qazaqistanning tinchliqi we muqimliqigha ehmiyet béridighanliqimizni tekitleymiz we ezamiz bilen küchlük hemkarliq ornitidighanliqimizni bildürimiz» dédi.

teshkilatqa eza döletler qazaqistanliqlarning soghuqqanliqi we ularning normal haletke qaytish arzusigha bolghan ishenchisini tekitlep: «biz qazaqistan dairilirini jiddiylikni peseytip, tertip  - intizam we xatirjemlikni eslige keltürüsh iqtidarigha ige dep qaraymiz. qazaqistan hökümiti we qazaqistan xelqi éhtiyajliq bolghan her qandaq yardemni bérishke teyyar ikenlikimizni jakarlaymiz» dégenlerni qeyt qildi.

bayanatta yene, teshkilatning weqede hayatidin ayrilghanlargha teziye bildüridighanliqi we yarilanghanlargha téz shipaliqlar tileydighanliqi bildürüldi.

qazaqistan ezerbeyjan, türkiye, qirghizistan we özbékistan bilen birlikte türk döletliri teshkilatining 5 ezasining biri.

türkmenistan bilen wéngiriye türk döletliri teshkilatining küzetküchi ezasidur.

bu teshkilat 2009-yili türk kéngishi dégen namda qurulghan bolup, 2021-yili noyabirda türkiyede ötküzülgen bashliqlar yighinida namini hazirqi «türk döletliri teshkilati»gha özgertkenidi.