rusiye qazaqistan weziyitining normallishishini ümid qildi

türkiye awazi radiyosi xewiri: rusiye tashqi ishlar ministirliqi yazma bayanat élan qilip, qazaqistandiki weqelerni yéqindin közitiwatqanliqini bildürdi.

bayanatta mundaq déyildi:

«hemme mesililerni kochilarda qalaymiqanchiliq chiqirip, qanunlargha xilapliq qilish bilen emes, belki asasiy qanun, qanun we diyalog ramkisida tinchliq usulida hel qilishni qollaymiz.»

bayanatta yene, qazaqistan pirézidénti qasim jömert toqayéwning bu heqte tashlighan qedemlirining, weziyetni muqimlashturushni, qanuniy teleplerde bolghan namayishchilarning mesililirini derhal hel qilshni meqset qilghanliqi eskertildi we: «rusiyening istratégiyelik shériklik we ittipaqliq munasiwetliri, qérindashliq we insaniy munasiwetliri bolghan bu dölettiki weziyetning imkaniyetning bériche eng qisqa waqit ichide normallishishini ümid qilimiz» déyildi.

qazaqistandiki rusiye diplomatik wakaletxanilirining etrapidiki weziyetning normal ikenliki eskertilgen bayanatta, namayishlarda héchqandaq rusiye puqrasining ziyan-zexmetke uchrimighanliqi, weziyetning yéqindin közitiliwatqanliqi bildürüldi.

qazaqistanning gherbide 2-yanwar (2022) din bashlap, suyuqlandurulghan gaz bahasining östürülüshi, dölettiki ijtimaiy we iqtisadiy ehwalining yamanlashqanliqi seweb qilinip bashlanghan namayishlar, bashqa jaylarghimu kéngeydi.

kochilardiki namayishlarda, xewpsizlik tarmaqliri bilen namayishchilar otturisida toqunushlar yüz berdi.

xewpsizlik tarmaqliri saqchi we herbiy aptomobillargha ot qoyup, hökümet binalirigha kirgen namayishchilarni awaz bombisi étip tarqitiwetti.

qazaqistan pirézidénti qasim jömert toqayéw partlighan namayishlargha hökümetning mesul ikenlikini bildürüp, hökümetning istépasini qobul qildi.

namayishlarning bezi rayonlargha kéngiyishi bilen, paytext nursultan, almuta shehiri we mangistaw ishtatlirida jiddiy halet élan qilindi.