қирғизистан пирезиденти садир җаппаровниң түркийә зийарити

йавроасийаға нәзәр - 77

1659943
қирғизистан пирезиденти садир җаппаровниң түркийә зийарити

қирғизистан пирезидентиниң түркийә зийарити

абдрәсул исһақов

 2021-йили, 6-айниң 9-күнидин 11-күнигичә, қирғизистан пирезиденти садир җаппаров тунҗи қетим түркийәдә зийарәттә болди. пирезидент җаппаров, 9-ийун әнқәрәдә җумһур рәис рәҗәп таййип әрдоған тәрипидин рәсмий мурасим арқилиқ қарши елинди. алди билән, икки дөләтниң рәһбәрлири айрим көрүшти. андин, 5-нөвәтлик түркийә-қирғизистан истиратегийәлик алий һәмкарлиқ кеңиши йиғини өткүзүлди. учришишлардин кейин, йеза игилик, сәһийә, мәдәнийәт вә тәнтәрбийә қатарлиқ саһәләрни өз ичигә алған 7 келишим имзаланди.

шу күни, түркийә – қирғизистан дөләт башлиқлири вә уларниң рәпиқилириниң иштирак қилишида, 4-нөвәтлик хәлқара иссиқ көл мунбири йиғининиң йепилиши ишқа ашурулди. чиңгиз айтматовниң мираси болған иссиқ көл мунбириниң тунҗи нөвәтлик йиғини өткән йили бишкәктә чақирилғаниди.

2021-йили, 6-айниң 10-күни, пирезидент җаппаров, түркийә бүйүк милләт мәҗлиси башлиқи мустафа шәнтоп билән көрүшти. учришишта, икки тәрәплик вә районлуқ мунасивәтләр музакирә қилинди.

пирезидент садир җаппаров кейинчә түркийә сода - санаәтчиләр вә карханичилар бирликини зийарәт қилди. түркийә сода - санаәтчиләр вә карханичилар бирлики иқтисад вә техника унверситити, җаппаровға пәхрий докторлуқ унвани бәрди. бу йәрдә җаппаров түрк сода - санаәтчиләргә хитаб қилди. 2021 -йили, 8-авғусттин 9-авғустқичә, иссиқ көлдә, түрк кеңишигә әза дөләтләрниң сода – иқтисад мунбири йиғини өткүзүлиду. пирезидент җаппаров түрк  сода – санаәтчиләрни бу сода – иқтисад мунбири йиғиниға тәклип қилди.

шу күни, садир җаппаров түркийәдики қирғизистан диаспорасиниң вәкиллири билән көрүшти. учришишта, түркийәдә йашаватқан қирғизистанлиқларниң мәсилилири музакирә қилинди.

зийарәт даирисидә садир җапароф, түрк кеңишиниң баш катипи бағдад амрейев билән көрүшти. қирғизистан пирезидентиниң түркийәдики зийарити кападокйа сәйлиси билән ахирлашти.

пирезидент садир җаппаровниң зийарити билән бирликтә түркийә-қирғизистан мунасивәтлиридә йеңи бир сәһипә ечилди. дипломатийә сийаситидә русийә билән хитайни имканийәтниң баричә тәңпуңлаштуруш җәһәттин, қирғизистанниң қериндаш түркийә билән техиму қойуқ һәмкарлишишиға тоғра келиду.

йеқинда таҗикистан билән болған чегра мәсилисидин көрүвелишқа болидуки, мудапиә саһәсидиму қирғизистан түркийә билән йеңи келишимләрни имзалаш вә йеңи мудапиә санаити мәһсулатлирини сетивелишқа еһтийаҗлиқтур. ахбарат васитилирида бу мәсилиниң әнқәрәдә музакирә қилинғанлиқи тоғрулуқ хәвәрләр елан қилинди.

қирғизистан сода – санаәтчиләр бирләшмисиниң түркийә  сода-санаәтчиләр вә карханичилар бирликигә охшаш актип бир органға айландурулуши тоғрисида даириләр оттурисида бирдәклик һасил қилинди. зийарәт даирисидә, қирғизистанниң чүй районида ортақ санаәт райони қуруш мәсилиси қайта күнтәртипкә кәлди.

түркийә бишкәктә салдурған вә «ковид – 19» йуқуми мәзгилидә интайин пайдилиқ болған қирғизистан-түркийә достлуқ дохтурханисиниң рәсмий ечилиши мәсилисиму зийарәт җәрйанида музакирә қилинди. икки дөләт оттурисида һасил қилинған келишимигә асасән, қирғизистанда давалиналмиған бимарлар түркийәгә кәлтүрүлүвататти. буниңдин кейин, бу бимарларниң қирғизистан-түркийә достлуқ дохтурханисида давалинишини ишқа ашуруш пиланланмақта. қирғизистан җумһурийити сәһийә вә иҗтимаий тәрәққийат министири алимқадир бәйшеналийев, зийарәт даирисидә  20 қирғиз дохтурниң түркийәдә икки йил тәҗрибә алмаштуруши мәсилисидә бирдәклик һасил қилиғанлиқини уқтурди. қирғизистан-түркийә манас университетиму келәр  қетимлиқ оқуш йилидин башлап медитсина факултетиға оқуғучи қобул қилишни башлайдиғанлиқини билдүрди. бу өзгиришләрниң һәммиси қирғизистан-түркийә мунасивәтлириниң йәниму йүксәк сәвийәгә йәткүзүлүшидә түрткилик рол ойнайду, әлвәттә.



مۇناسىۋەتلىك خەۋەرلەر