türk jumhuriyetlirining axbarat wasitiliri we uchur hemkarliqi

awroasiyagha nezer - 69

1626472
türk jumhuriyetlirining axbarat wasitiliri we uchur hemkarliqi

3 – nöwetlik türk kéngishi axbarat wasitiliri we uchur ishlirigha mesul ministirlar we aliy derijilik rehberler yighini

abdresul ishaqo

2021-yili, 10 – aprél küni, bakuda ezerbeyjan muawin pirézidénti, pirézidént mehkimisi tashqi siyaset ishliri mesuli hikmet hajiyéwning sahibxaniliqida, 3 – nöwetlik  türk kéngishi axbarat wasitiliri we uchur ishlirigha mesul ministirlar we aliy derijilik rehberler yighini chaqirildi. yighingha, qazaqistan, qirghizistan, wéngiriye, özbékistan we türkiyedin aliy derijilik rehberler qatnashti.

türk kéngishining bash katipi baghdad amréyéw, yighinning échilish murasimida qilghan sözide, axbarat wasitiliri we uchur hemkarliqining muhim ishlar küntertipidiki mesililerning biri ikenlikini tekitlidi. arqidin, qazaqistan jumhuriyiti uchur we ijtimaiy tereqqiyat ishliri muawin ministiri esqet oralow, qirghizistan  jmhuriyiti medeniyet, uchur, tenterbiye we yashlar ministiri qayrat imanaliyéw, wéngriye jumhuriyiti dölet bixeterlik ishliri siyasiti ministiri pétér sztaray, özbékistan jumhuriyiti pirézidént mehkimisi uchur we ammiwi xewerlishish orginining reisi esedjan xojayéw we türkiye jumhuriyiti jumhur reislik mehkimisi uchur - alaqe ishliri idarisining bashliqi fahrettin altun qatarliqlar nutuq sözlep, axbarat wasitiliri sahesidiki hemkarliqning muhimliqini tekitlidi.

yighin axirida, terepler «2021-2022 – yilliq heriket pilani» ni testiqlidi, hemde munasiwetlik pirogrammining ijra qilinishigha rehberlik hem nazaret qilish üchün,  eza döletlerning yuqiri derijilik wekilliridin terkib tapqan türk kéngishi axbarat wasitiliri maslashturush komitéti qurushni qararlashturdi. buningdin bashqa yene,  höjjetlerdin ortaq behrilinish kélishimnamisi (FTP) kölchikining yoshurun küchini eng zor derijide ashurush, eza döletlerning ortaq tarixi we medeniyiti toghrisida her xil sin matériyallirini ortaq ishlepchiqirishni köpeytish we axbarat wasitiliri mutexessisliri üchün almashturush pirogrammiliri we terbiyelesh kursliri teshkillesh mesililiridimu ortaq tonush hasil qildi. yighinda, terepler, xelqara türk xewer qanili qurush, resmiy axbarat wasitiliri organliri otturisidiki hemkarliqini kücheytish we eza döletlerning milliy téléwiziye qanalliri ara hemkarliqni chongqurlashturushning zörürlükini tekitlidi. heyet mesulliri yene, türk kéngishi nöwetchi reislik wezipisining türkiye jumhuriyitige ötüshi seweblik, 2021-yili türkiyede «xelqara axbarat wasitiliri munbiri» yighini chaqirish mesiliside birdeklik hasil qildi.

türk kéngishige eza döletlerning axbarat wasitiliri we uchur saheliride hemkarliqini mustehkemlewatqanliqi kishini xushal qilidu. yighinda qarar qilinghan türk kéngishi axbarat wasitiliri maslashturush komitétining qurulushi nahayiti toghra bir qedem boldi.

merhum chinggiz aytmatow, türk dunyasini dunyagha tonushturidighan bir téléwiziye qanili qurushning zörürlükini otturigha qoyghanidi. bakudiki yighinda qobul qilinghan xelqara türk xewer qanili qurush qarari, meshhur yazghuchining iradisining emelge éshiwatqanliqidin dérek béridu. shuni izahlash hajetki, türk kéngishige eza döletlerning téléwiziye qanalliri türkiyening türksat süniy hemrahi arqiliq tarqitilidu.

gerche türk jumhuriyetliri musteqil bolghanliqigha 30 yil bolghan bolsimu, lékin, türk dunyasi her xil sewebler tüpeylidin bir-birini yéterlik derijide tonuyalmidi. yighinda qobul qilinghan axbarat wasitiliri wekilliri ara uchur we tejribe almashturushni ashurush, matériyaldin ortaq paydilinish xizmitini yenimu yüksek sewiyege yetküzüsh, axbarat wasitiliri munbiri yighinliri chaqirish qararliri bu kemtüklükni tügitidu. türkiy xelqler axbarat wasitiliri sayisida bir-birini téximu yaxshi tonughanséri, türk jumhuriyetliri otturisidiki hemkarliq téximu küchiyidu.



مۇناسىۋەتلىك خەۋەرلەر