ezerbeyjan armiyesi kelbejerde bayraq qadidi

erméniye 1993 – yili ishghal qilghan kelbejer wilayitige aridin 27 yil ötkendin kéyin kirgen ezerbeyjan armiyesi sheher merkizige bayraq qadidi.

1535876
ezerbeyjan armiyesi kelbejerde bayraq qadidi

türkiye awazi radiyosi xewiri: ezerbeyjan dölet mudapie ministirliqi, ezerbeyjan bilen erméniye imzalighan kélishimge asasen, erméniye armiyesi 25 – noyabir küni boshatqan kelbejerning körünüshlirini tarqatti.

körünüshlerde, sheherdiki öy – imaretlerning weyran qiliwétilgenliki we köydürüwétilgenliki, köp sanda del – derexlerning késip tashlanghanliqi körülidu.

sheher merkizidiki öz péti saqlinip qalghan binalardin birige kirgen ezerbeyjan eskerliri, etrapni tazilap, binagha ezerbeyjan bayriqini asidu.

sheherge kirgen eskerlerning qomandani, binaning aldida pirézidént ilham eliyéwgha xitaben, «hörmetlik bash qomandanim, ezerbeyjan bayriqi kelbejer shehiride lepildimekte. ezerbeyjan yashisun! bash qomandan yashisun! qarabagh ezerbeyjandur» deydu.

ezerbeyjan armiyesining 27 – séntebir küni qozghighan herbiy herikiti dawamida, 5 sheher merkizi, 4 kent we 286 yéza azad qilinghandi kéyin, erméniye meghlubiyitini étirap qilghan, arqidinla, aghdam, lachin we kelbejer wilayetlirini boshitish nishan qilinghan kélishimni imzalighanidi.

erméniye, urush toxtitish kélishimige asasen,  20 – noyabir küni aghdamdin, 25 – noyabir küni kelbejerdin chékingenidi.



مۇناسىۋەتلىك خەۋەرلەر