eliyéw: tarixiy yadikarliqlirimiz dölet teripidin qoghdiliwatidu

ezerbeyjan pirézidénti ilham eliyéw erméniyening ishghalidin azad qilinghan rayonlardiki barliq tarixiy yadikarliqlarni qoghdawatqanliqlirini éytti.

1533301
eliyéw: tarixiy yadikarliqlirimiz dölet teripidin qoghdiliwatidu

türkiye awazi radiyosi xewiri: eliyéw repiqisi méhriban eliyéwa bilen birlikte tünügün erméniyening ishghalidin azad qilinghan aghdam shehirini ziyariti esnasida, asasliq qurulmisi öz péti saqlinip qalghan birdinbir yadikarliq bolghan tarixiy jameni ékskursiye qildi, hemde bu yerde qilghan sözide, aghdamning weyran bolghanliqini körüshning tolimu azabliq ish ikenlikini qeyt qildi.

urush mezgilide özlirini siyasiy we meniwi jehettin qollighan döletlerning béshida türkiye we biwasite jumhur reis rejep tayyip erdoghan kélidighanliqini eskertken eliyéw, türkiyedin bashqa yene, birqanche döletningmu qollishigha érishkenliklirini, bir qisim gherb rehberlirining, ezerbeyjan ishghaldin azad qilghan rayonlardiki xiristiyanlarning ibadetxanilirining aqiwitining qandaq bolidighanliqi mesilisini küntertipke kirgüzgenliklirini, jümlidin, hem özliri bilen körüshkenliride hemde resmiy bayanatlirida bu heqtiki endishilirini otturigha qoyghanliqlirini tekitlep mundaq dédi: «héchkimning, bolupmu hés – tuyghulargha islam düshmenlikining otini tutashturuwetken gherb rehberlirining bu heqte endishe qilishining qilche hajiti yoq. derweqe, ular muqeddes islam dinining qimmet ölchemlirini nezerdin saqit qiliwatidu, hetta haqaret qilghuchilarni <heqliq> dep qarawatidu. shunga, ularning bu heqte söz échish hoquqi yoqtur. buningdin bashqa yene, bizning arimizdiki barliq ibadetxanilar, bizning tarixiy bayliqlirimizdur. jamelerni taqilghanlar téxi bizni tenqid qilmaqchimu? jamelerge choshqa béshini ésip qoyghuchilarning, bizge nesihet qilish we endishilirini otturigha qoyush salahiyiti barmu? derweqe, bizge héchqandaq bir endishining otturigha qoyulushining hajitimu yoq. chünki, barliq tarixiy yadikarliqlirimiz dölet teripidin qoghdalmaqta.»

eliyéw, erméniyening ishghaliyiti mezgilide ezerbeyjanliqlargha ait köp sanda jamening chéqiwétilgenlikini, bir qismining choqa qutini süpitide ishlitilgenlikini eskertip mundaq dédi: «bu ehwal, bir qisim gherb rehberlirini endishilendürdimu? yaq, démek, ularning éngiche bolghanda, jamelerge haqaret qilishqa, jamelerni weyran qilishqa we choshqa qutinigha aylandurushqa bolidu. undaqta, ular buni ochuq – ashkara halda éytsun we biz bilen hepileshmey, öz döletliridiki bashqa mesililerni hel qilishqa tirishsun. héchkim bizning ichki ishlirimizgha arilashmisun. chünki, biz bu sewiyege özimizning tirishchanliqlirigha tayinip yettuq. bu döletlerning tetür teshwiqatlirigha, ighwagerliklirige qarimay, qan töküp öz zéminimizni azad qilduq. hemme kétip, öz ishliri bilen meshghul bolsun.»



مۇناسىۋەتلىك خەۋەرلەر