ezerbeyjan erméniye qisimlirining hujumlirini chékindürdi
ezerbeyjan armiyesi kéche boyiche erméniye armiyesining urush toxtitishqa qarimastin qilghan hujumini chékindürdi.
türkiye awazi radiyosi xewiri: ezerbeyjan dölet mudapie ministirliqi erméniye armiyesining kéche boyiche qilghan hujumlirining chékindürülgenliki toghrisida bayanat élan qildi.
bayanatta, erméniye qisimlirining qoldin bérip qoyghan nuqtilarni qaytidin ishghal qilish üchün eghdere, aghdam, fuzuli we jebrail linyeside kichik guruppilar halida qilghan hujumlirining chékindürülgenliki qeyt qilindi.
bayanatta, ezerbeyjan armiyesining erméniye qisimlirining bir dane «T-72» tipliq tankisini, üch dane bashqurulidighan bomba sistémisini pachaqlap tashlighanliqi we nurghun eskerning bir terep qilinghanliqi eskertildi.
bayanatta yene, erméniye armiyesining 9-, 5- we 522- polk eskerlirining urush meydanida aptomobillirini tashlap qoyup chékingenliki, 1-polk jaylashqan yerde bir yer asti panahlinish jayining bitchit qilinghanliqi qeyt qilindi.
ezerbeyjan armiyesining barliq seplerde üstünlükni igelligenliki, erméniye armiyesining aghdam, terter we goranboy wilayetlirige oq atqanliqi bildürüldi.
ezerbeyjan bilen erméniye moskwada ötküzülgen söhbette, 2020-yili 10-öktebir (shenbe) saet 12:00 din bashlap taghliq qarabaghdiki jesetlerni we esirlerni almashturush teklip qilinghan insanperwerlik meqsitidiki urush toxtitshni qarar qilghan idi.
