tajikstanda saylam ötküzüldi
tajikstanda tünügün (2020-yili 11-öktebir) pirézidéntliq saylimi ötküzüldi.
türkiye awazi radiyosi xewiri: tajikstanda ötküzülgen pirézidéntliq saylimida, hakimiyet béshidiki xelq démokrat partiyesidin namzat körsitilgen pirézidént imameli raxman, déhqanlar partiyesining rehbiri rüstem latifzade, sotsiyalist partiye rehbiri abduhalim gaffarzade, iqtisadiy islahatlar partiyesi rehbiri rüstem rahmatzade we kommunist partiye rehbiri miraj abdulloyéw qatarliq namzatlar özara riqabetleshti.
4 milyon 943 ming 289 tizimgha élinghan saylighuchi bar tajikstanda, 68 saylam rayonida 3 ming 375 saylam sanduqi tesis qilindi. chet ellerdiki tajikstan puqraliri üchün türkiyeni öz ichige alghan her qaysi döletlerdiki elchixana we konsulxanilarda 39 awaz sanduqi tesis qilindi.
tajikstan merkizi saylam komitétining bashliqi bextiyar xudayarzade shu yer waqti 15:00 te %70.71 saylighuchigha toghra kélidighan 3 milyon 495 ming 215 saylighuchining bélet tashlighanliqini bildürüp, saylam qanuni boyiche, bu nisbetning saylamning inawetlik bolushi üchün yéterlik ikenlikini qeyt qildi.
%50 din artuq awazgha érishken namzat pirézidént bolidu. tajikstanda pirézidéntning wezipe ötesh mudditi yette yil bolidu. 2013-yili 6-noyabir ötküzülgen we alte namzat riqabetleshken saylamda, imameli raxman %83.92 awazgha ériship tötinchi nöwet pirézidént bolghan idi.
imameli raxman tünügün ötküzülgen saylamda bolsa, %90.92 awazgha ériship beshinchi nöwet pirézidént bolup saylandi.
tajikstan merkizi saylam komitétining bashliqi bextiyar xudayarzade axbarat élan qilish yighinida, 4 milyon 221 ming saylighuchi awaz tashlighan saylamda, saylamgha qatnishish nisbitining %85.39 bolghanliqini bildürdi.
u hakimiyet béshidiki xelq démokrat partiyesining namzati imameli raxmanning %90.92, ikkinchi chong partiye bolghan déhqanlar partiyesining rehbiri rüstem latifzadening %3.03, iqtisadiy islahatlar partiyesi rehbiri rüstem rahmatzadening %2.15, sotsiyalist partiye rehbiri abdulhalim gaffarzadening %1.49, kommunist partiye rehbiri miraj abdulloyéwning %1.17 awazgha érishkenlikini qeyt qildi.
imameli raxman 1994-, 1999-, 2006- we 2013-yilliri ötküzülgen saylamlarda arqimu arqa pirézidént bolup saylanghan idi.
