түрк кеңиши йуқумға қарши туруш һәмкарлиқини күчәйтиш йолида қәдәм ташлиди

түркийә авази радийоси хәвири: түрк тилида сөзлишидиған дөләтләр һәмкарлиқ кеңиши (түрк кеңиши)дин игилинишичә, түрк кеңишигә әза вә көзәткүчи дөләтләрниң йуқири дәриҗилик әмәлдарлири вә тәтқиқатчилар билән  сәһийә министирлиқи илим – пән комитети әзалириниң иштирак қилиши билән чақирилған «түрк кеңиши сағламлиқ илими комитети» телевизийә йиғинида ковид – 19 ға қарши һәмкарлиқ вә иттипақлиқни күчәйтишниң конкрет қәдәмлири музакирә қилинған.

түрк кеңишиниң баш катипи бағдат амрейев рийасәтчилик қилған йиғинда,  кеңәшкә әза дөләтләр арисида даимлиқ ортақ санлиқ мәлумат амбири вә йуқум әһвалини назарәт қилиш системиси орнитиш йумшақ деталини тәрәққий қилдуруш тоғрисида келишим һасил қилинди.

йиғинда йәнә,  түркийәниң алдимиздики айниң иккинчи йеримида әза дөләтләрниң сәһийә хадимлириға измер- урлада йуқумға қарши туруш саһәсидә тәрбийәләш лексийәлирини вә һәр хил тәҗрибә саһәлиридә торда тәрбийиләш курслирини орунлаштуруши қарар қилинди.

түркийә сәһийә министири йардәмчиси әминә алп мәшәму түркийәдә ковид – 19 бимарлирини давалашта йолға қойулған давалаш усуллири, ишлитилгән дорилар вә башқа мәсилиләр тоғрисида әтраплиқ мәлумат бәргән йиғинниң соал – җаваб қисмида түркийә һәйити,  һәр қайси дөләтләрниң вәкиллириниң вухән вирусиға қарши күрәшкә даир соаллириға җаваб бәрди.

йиғинда йәнә, түрк кеңиши илмий комитетиниң алдимиздики күнләрдиму қәрәллик йиғин ечип туруши тоғрисида бирдәклик һасил қилинди.