eliyéw: ezerbeyjan «türk éqimi» layihesini bashtin tartip qollighan

ezerbeyjan pirézidénti ilham eliyéw ezerbeyjanning «türk éqimi» layihesini bashtin tartip qollap kelgenlikini éytti.

eliyéw: ezerbeyjan «türk éqimi» layihesini bashtin tartip qollighan

türkiye awazi radiyosi xewiri: ezerbeyjan pirézidénti ilham eliyéw rusiyening «Rossiya 24» qanilining ziyaritini qobul qilghanda, rayonluq énérgiye layiheliri üstide toxtaldi.

u rusiye bilen ezerbeyjan teripidin ijra qiliniwatqan énérgiye layihelirining bir-birige reqip emeslikini, jenubiy gaz karidori layihesining axirlishishi bilen yiligha 10 milyard kub métir tebiiy gazning ezerbeyjandin yawropagha yetküzülidighanliqini qeyt qildi.

u: «bu rusiyening yiligha 170-150 milyard kub métirliq tebiiy gaz teminlishige sélishturghanda nahayiti kichik san. shunga, jenubiy gaz karidori reqip layihe emes» dédi.

u «türk éqimi» layihesi toghrisidimu toxtaldi. u mundaq dédi:

«türkiye bilen rusiye üchün éytqanda, türk éqimi layihesining qanchilik muhim ikenlikini bilimiz. her ikki dölet bizning yéqin shériklirimiz. baku, türk éqimi layihesini bashtin tartip qollap keldi. buningdin bashqa yene, ezerbeyjan bilen rusiye türkiyede qurulghan tebiiy gaz ul-esliheliridin ortaq paydilinishi mumkin.»

rusiye gazini türkiye arqiliq yawropagha yetküzidighan «türk éqimi» layihesining resmiy échilish murasimini 2020-yili 8-yanwar istanbulda ötküzüshning pilan qilinghanliqi bildürülmekte.  



مۇناسىۋەتلىك خەۋەرلەر