özbékstanda parlamént saylimi ötküzüldi
özbékstanda tünügün (22-dékabir) ötküzülgen omumiy saylamning netijiliri élan qilindi.
türkiye awazi radiyosi xewiri: özbékstan merkiziy saylam komitétining bashliqi mirza ulughbék abdusalamow tünügün ötküzülgen parlamént saylimida, libéral démokrat partiyesining %43, milliy yüksélish partiyesining %35, adalet sotsiyal démokrat partiyesining %21, xelq démokrat partiyesining %18 we özbékstan ékologiye partiyesining %11 awazgha érishkenlikini bildürdi.
mirza ulughbék abdusalamow chet ellerdiki özbékstan puqralirinimu nezerde tutqanda, saylamgha qatnishish nisbitining %67.8 ge yetkenlikini bildürüp, 13 milyon 355 ming 911 saylighuchining awaz bergenlikini qeyt qildi.
u özbékstan miqyasidiki 150 saylam rayonining 128 ide parlamént ezalirining saylanghanliqini, namzatlarning héchbiri %50 din artuq awazgha érishelmigen 22 saylam rayonida eng köp awazgha érishken ikki namzatning, ikki heptidin kéyin qayta riqabetlishidighanliqini eskertti.
u siyasiy partiyelerning érishken awaz nisbiti toghrisida melumat bermidi, emma saylam belgilimisige we saylam qanunigha xilapliq qilinghanliqigha munasiwetlik erz-shikayetlerning özlirige yétip kelgenlikini, bularning saylam netijisige tesir körsiteligidek derijide emeslikini bildürdi.
«yéngi özbékstan, yéngi saylamlar» shoari astida ötküzülgen bu saylamda, dölettiki besh siyasiy partiyening 750 namzati, parlaménttiki 150 orunni qolgha keltürüsh üchün riqabetleshti.
saylamda eng köp awazgha érishken partiye, bash ministir namzatini belgilep, testiqlinishi üchün pirézidéntqa sunush hoquqigha érishidu.
