қазақистан пирезиденти йеңи латин елипбәсидики йетәрсизликләрни түгитиш тоғрисида йолйоруқ чүшүрди
қазақистан пирезиденти қасим җөмәрт токайев, икки йил илгири қобул қилинған латин елипбәсидики кәмчиликләрни толуқлаш тоғрисида йолйоруқ чүшүрди.
түркийә авази радийоси хәвири: қазақистан пирезиденти токайев иҗтимаий таратқу тори арқилиқ байанат берип, кирил елипбәсидин латин елипбәсигә өтүш қарариниң икки йил чиқирилғанлиқини хатириләткән һалда «бирақ, елипбәдә һазирму йетәрсизликләр бар. тилшунаслар елипбәни йахшилиши керәк. күлтүр вә тәнтәрбийә ишлири министир актоти райимқулуваға мунасивәтлик йолйоруқни чүшүрдүм. алдимизда җиддий хизмәтләр ишлиниду» деди.
қазақистанниң қурғучи пирезиденти нурсултан нәзәрбайев 2017 – йили өктәбирдә кирил елипбәсидин латин елипбәсигә өтүш тоғрисида қарарнамә чиқирип, кәсмә ишарити ишлитилгән латин елипбәсини мақуллиғаниди.
кәсмә ишарити бар елипбә хәлқ арисида дәталаш пәйда қилғандин кейин, өткән йили февралда нурсултан нәзәрбайев, елипбәниң кәсмә ишарәтләр чиқириветилгән йеңи нусхисини чиқиришни қарар қилғаниди.
қазақистан 1929 – йилидин 1940 – йилиғичә латин елипбәсини ишләткән болуп, арқидин силавйан елипбәсигә өткәниди.
татар латин елипбәсигә өтүшни қарар қилған қазақистанда дәрслик китаблириниң йеңи елипбә билән бесилиши вә йезиқ өзгәртиш хизмәтлириниң 2025 – йилиғичә тамамлиниши пиланланмақта.
