ezerbeyjan jumhuriyiti qurulghanliqining 101 yilliqi tebriklendi

ezerbeyjanda 1918-yili 28-may élan qilinghan jumhuriyetning 101-yili tebriklendi.

ezerbeyjan jumhuriyiti qurulghanliqining 101 yilliqi tebriklendi

türkiye awazi radiyosi xewiri: tebriklesh paaliyetliri dairiside ezerbeyjan pirézidénti ilham eliyéw paytext bakudiki jumhuriyet xatire sariyi aldida ötküzülgen murasimgha ishtirak qildi. ezerbeyjan dölet marshi oqulghan murasimda, eliyéw xatire téshigha gülchembirek qoydi.

jumhuriyet bayrimi munasiwiti bilen amérika qoshma ishtatliri, yaponiye, büyük biritaniye, xitay, san marino, bulghariye, italiye, türkmenistan, misir, qazaqistan, aljiriye, qirghizistan, tajikistan, kuba, bélgiye, seudi erebistan, iraq, hindistan, afghanistan, awstriye, özbékistan, shiwétsiye, jenubiy koréyege oxshash nurghun döletning rehber yaki yuqiri derijilik emeldarliri pirézidént ilham eliyéwni tebriklidi.

jumhur reis rejep tayyip erdoghanmu pirézidént ilham eliyéwgha tebrik télégrammisi yollidi.

1918-yili 28-may giruziyening tiflis shehiride mehmet emin resulzade bashchiliqidiki ezerbeyjan milliy shurasi, ezerbeyjan jumhuriyitining musteqilliqini élan qilidu. baku ermen we bolshéwik banditlirining ishghali astida bolghanliqi üchün fethali xan howski bashchiliqida teshkil qilinghan waqitliq ezerbeyjan hökümiti, herikitini bir mezgillik genje shehirige yötkeydu.

osmanli döliti ezerbeyjanning musteqilliqini tunji bolup étirap qilidu. nuri pasha (killigil) qomandanliqidiki kawkaz islam armiyesi ikki dölet otturisida tüzülgen kélishim ramkisida künséri éship bériwatqan ermen we bolshéwik tehditlirige qarshi yardemge ewetilidu. kawkaz islam armiyesi göychay, salyan, aghsu we kürdemirni bolshéwik we ermen banditliridin tazilaydu, 1918-yili 15-séntebir bakuni qutquzidu. kawkaz islam armiyesining 130eskiri bakuni qutquzush urushida shéhit bolidu.

sherqning tunji démokratik jumhuriyiti dep qobul qilinidighan ezerbeyjanda, qisqa waqit ichide maarip, din we pikir erkinliki saheside islahatlar élip bérilidu, döletning öz puli bésilidu. jumhuriyetning «istiqlal xitabnamesi» de, irq, din, mezhep we jinsiyet ayrimchiliqi qilinmastin, barliq puqralargha teng-barawerlik hoquqi bérilidu.


خەتكۈچ: ezerbeyjan

مۇناسىۋەتلىك خەۋەرلەر