чингиз айтиматов алаһидә мурасим билән хатириләнди

түркийә авази радийоси хәвири: қазақистан дөләтлик күтүбхананиси тәрипидин уйуштурулған мурасимға қирғизистанниң астанадә турушлуқ баш әлчиси җәнбек қулубайев, парламент әзаси саутбек абдирәһмановдин башқа йәнә, нурғун санда әдәбийатчи вә меһманлар қатнашти.

чингиз айтиматов һәққидә қисқа тонуштуруш филими көрситиш билән башланған паалийәтниң арқидин қирғизистан баш әлчси қулубайев сөз қилип, униң қирғиз вә қазақ күлтүрини пүтүн дунйаға тонутқанлиқини ейтти.

қулубайев: «йазғучимиз қирғизистан билән қазақистанниң өзара мунасивәтлириниң тәрәққийатиға чоң төһпиләрни қошти» деди.

қирғизистан парламент әзаси абдирәһановму чингиз айтиматовниң йалғуз қазақлар билән қирғизларниңла әмәс, пүтүн түрк дунйасиниң йазғучиси икәнликини тәкитләп, «қазақ йазғучи мухтар арезовдин кейин түрк дунйасини бирләштүргән йазғучи айтиматовдур. дунйаға боз қирларниң һайатини, хәлқлиримизниң қиммәт қарашлирини тонутти» деди.

абдирәһанов йәнә, «айтиматовниң қалдуруп кәткән әсәрлири алаһидә әһмийәткә игә. айтиматовниң дунйа әдәбийатида мәңгү йашайдиғанлиқиға ишинимән» дегән сөзләрниму ишләтти.

чингиз айтиматов 1928 – йили 12 – декабирда қирғизистанниң талас вилайитигә қарашлиқ шәкәр йезисида дунйаға кәлгән иди.