aqinji: kona tüzümning dawamlishishini xalimaymiz

türkiye awazi radiyosi xewiri: pirézidént mustafa aqinji, shimaliy qibris türk jumhuriyiti hökümitini teshkil qilghan siyasiy partiyelerning bashliqlirini pirézidéntliq mehkimiside qobul qilghandin kéyin muxbirlarning soallirigha jawab bérip, birleshken döletler teshkilati (b d t) bash katipining qibris alahide wekili élizabét spéxar bilen qibris söhbetliri boyiche ishenchni kücheytküchi chare – tedbirler dairiside échilishi pilanliniwatqan derinya we aplich chégra éghizlirining baldurraq échilishi toghrisida sözleshkenlikini qeyt qildi.

u, qibris doklatining mushu ay ichide b d t da élan qilinishi bilen rim rehber nikos anastasiadis bilen körüshüshlirining mumkinlikini eskertip, «buning bek uzun bolmighan bir waqitta ishqa ashurulushini arzu qilimen» dédi.

pirézidént aqinji, rim rehber bilen ötküzidighan uchrishishta, derinya we aplich éghizlirining échilish waqtini birlikte békitip jamaetchilikke élan qilishni we aralning kélechikining qandaq shekillinidighanliqi toghrisida sözlishishni oylishiwatqanliqini bildürdi.

aralda téximu yaxshi we güzel kélechek yaritishning mesuliyetliri barliqigha isharet qilghan pirézidént mustafa aqinji, aldimizdiki künlerning heriketlik ötidighanliqini we yelkige yüklengen mejburiyetlerni ada qilidighanliqini éytti we sözini dawamlashturup, «bu aralda tinch, xatirjem kélechek qurushni xalaymiz. qibrista kona tüzümning dawamlishishini xalimaymiz. b d t ramkisining sirtigha chiqmasliqimiz lazim. b d t bu ishning ichide bolidu, bolushi kérek» dégenlerni qeyt qildi.