ақинҗи: кона түзүмниң давамлишишини халимаймиз

түркийә авази радийоси хәвири: пирезидент мустафа ақинҗи, шималий қибрис түрк җумһурийити һөкүмитини тәшкил қилған сийасий партийәләрниң башлиқлирини пирезидентлиқ мәһкимисидә қобул қилғандин кейин мухбирларниң соаллириға җаваб берип, бирләшкән дөләтләр тәшкилати (б д т) баш катипиниң қибрис алаһидә вәкили елизабет спехар билән қибрис сөһбәтлири бойичә ишәнчни күчәйткүчи чарә – тәдбирләр даирисидә ечилиши пиланлиниватқан дәринйа вә аплич чегра еғизлириниң балдуррақ ечилиши тоғрисида сөзләшкәнликини қәйт қилди.

у, қибрис доклатиниң мушу ай ичидә б д т да елан қилиниши билән рим рәһбәр никос анастасиадис билән көрүшүшлириниң мумкинликини әскәртип, «буниң бәк узун болмиған бир вақитта ишқа ашурулушини арзу қилимән» деди.

пирезидент ақинҗи, рим рәһбәр билән өткүзидиған учришишта, дәринйа вә аплич еғизлириниң ечилиш вақтини бирликтә бекитип җамаәтчиликкә елан қилишни вә аралниң келәчикиниң қандақ шәкиллинидиғанлиқи тоғрисида сөзлишишни ойлишиватқанлиқини билдүрди.

аралда техиму йахши вә гүзәл келәчәк йаритишниң мәсулийәтлири барлиқиға ишарәт қилған пирезидент мустафа ақинҗи, алдимиздики күнләрниң һәрикәтлик өтидиғанлиқини вә йәлкигә йүкләнгән мәҗбурийәтләрни ада қилидиғанлиқини ейтти вә сөзини давамлаштуруп, «бу аралда тинч, хатирҗәм келәчәк қурушни халаймиз. қибриста кона түзүмниң давамлишишини халимаймиз. б д т рамкисиниң сиртиға чиқмаслиқимиз лазим. б д т бу ишниң ичидә болиду, болуши керәк» дегәнләрни қәйт қилди.