amérika armiyesi merkiziy qomandanliq ishtabi bashliqi özbékistanda ziyarette boldi

türkiye awazi radiyosi xewiri: özbékistan pirézidéntliq mehkimisi metbuat ishliri ishxanisi bu heqte bayanat bérip, uchrishishta shewket mirziyayéwning, özbékistan bilen amérika arisidiki istratégiyelik shérikchilik we köp yönilishlik hemkarliqning bolupmu siyaset, soda, iqtisad, sélinma, téxnologiye we medeniyet sahesi boyiche süret bilen güllinishidin memnun ikenlikini tilgha alghanliqini bildürdi.

xewpsizlik, herbiy we herbiy – téxnika saheliridiki hemkarliq etrapliq shekilde muhakime qilinghan uchrishishta, rayonning muqimliqigha ziyanliq amillargha qarshi küresh we afghanistandiki weziyetke tinch chare tépish qatarliq mesililer toghrisidimu muzakire élip bérildi.

shewket mirziyayéwgha amérika pirézidénti donald trampning salam we yaxshi tileklirini yetküzgen général joséf wotél, amérikining mart éyida tashkentte ötküzülgen afghanistangha alaqidar xelqara yighinni qollaydighanliqini eskertti.

uchrishishta, afghanistanda tinchliq we muqimliq ornitishning soda we iqtisadiy jehette rayon xaraktérlik hemkarliqni rawajlandurush, afghanistan we pütkül ottura asiya döletlirining menpeetlirige alaqidar zor kölemlik üsturulma qurulushlirini royapqa chiqirish üchün katta pursetlerni yaritidighanliqi tilgha élip ötüldi. uchrishishta yene, mirziyayéwning aldimizdiki hepte amérikigha qaritidighan dölet ishliri ziyaritining özbékistan – amérika hemkarliqini yuqiri pellige chiqiridighanliqi tekitlendi.

özbékistan pirézidéntliq mehkimisi metbuat ishliri ishxanisining bayanatigha qarighanda, mirziyayéwning 15 – maydin 17 – mayghiche dawamlishidighan tunji qétimliq resmiy ziyariti jeryanida «özbékistan – amérika: istratégiyelik shérikchilik» namliq bir bayanatning imzalinishi pilanlanmaqta.