qirghizistanning yéngi pirézidénti wezipe tapshuruwaldi

türkiye awazi radiyosi xewiri: qirghizistanda 15-öktebir ötküzülgen saylamda ghelibe qilghan sotsiyal démokrat partiyening namzati soronbay jeenbékowning qesem qilip, wezipe tapshuruwélish murasimi ötküzüldi. murasimgha chet ellik méhmanlar teklip qilinmidi, peqet pirézidéntliq mehkimisining axbarat merkiziy qatnashturuldi. qirghizistan merkiziy saylam komitétining bashliqi nurjan shaildabékowa pirézidéntliq iznikini jeenbékowgha tapshurdi.

jeenbékow sabiq pirézidént atambayéw din qirghizistan bayriqini söyüp tapshuruwaldi we qirghizistan asasiy qanunigha qolini qoyup qesem qildi. u sözide, birinchi bolup adil we erkin saylamlarning ötküzülishige ejir singdürgen sabiq pirézidént almazbék atambayéwni eng aliy mukapat bilen mukapatlash qararini testiqlaydighanliqini bildürdi.

u sözide, köp milletlik xelqning birlik we barawerlikini tekitlep, dölette, bolupmu yurtwazliq we étnik ayrimichiliqqa ruxset qilmaydighanliqlirini eskertti. u musteqil qirghizistanning démokratik yolda algha ilgirilewatqanliqini pütkül dunyagha ispatlap bergenlikini bildürüp: «musteqilliq tariximizda tunji qétim tinchliq bilen rehber almashti» dédi.

u özini qollighan xelqqe teshekkür éytti we tashqi siyasette milliy menpeetni qoghdashni dawamlashturidighanliqlirini qeyt qildi. u: «rusiye fédératsiyesi bilen istratégiyelik munasiwetlirimizni kücheytimiz, xitay bilen munasiwetlirimizni chongqurlashturimiz, ottura asiyadiki qoshna döletler bilen tarixiy rishtilirimizni asas qilghan halda munasiwetlirimizni tereqqiy qildurimiz, yawropa ittipaqi döletliri bilen yéqin munasiwet ornitishni dawamlashturimiz, türkiye we amérika bilen hemkarliqimizni tereqqiy qildurimiz» dédi.

u alte yilliq pirézidéntliq mezgilide xelqning parawanliqi we döletning tereqqiyati üchün xizmet qilidighanliqini bildürdi.

sabiq pirézidént atambayéwmu murasimda söz qilip, jeenbékowgha muweppeqiyet we mol bext tilidi. u wezipe ötesh jeryanida nurghun ishlarni qilalmighanliqini eskertti we qirghizistan xelqidin epu soridi.

soronbay jeenbékow 15-öktebirde ötküzülgen saylamda %54.22 awazgha érishken idi.