әлийев: зөрүр тепилғанда, әрменийәниң һәрбий иғвагәрчиликигә тегишлик җаваб қайтуримиз

түркийә авази радийоси хәвири: әлийев нийу йоркта чақирилған бирләшкән дөләтләр тәшкилатиниң 72 – нөвәтлик омумий кеңәш йиғинида қилған сөзидә, әзәрбәйҗан – әрменийә оттурисидики тағлиқ қарабағ мәсилиси тоғрулуқ тохталғанда, әзәрбәйҗан земининиң әрменийәниң ишғалийити астида икәнликини, ишғал сәвәбидин 1 милйондин артуқ әзәрбәйҗан пуқрасиниң мусапирға айлинип қалғанлиқини әскәртти.

тағлиқ қарабағ вә ишғал астидики башқа районлардиму әзәрбәйҗанлиқларға қарши етник тазилаш һәрикәтлириниң елип берилғанлиқини қәйт қилған әлийев  мундақ дәп көрсәтти: «әрменийә 1992 – йили 26 - феврал йүз бәргән хоҗали қәтлиамида 613 пуқрайимизни қәтл қилди. уларниң ичидә 106 си айал, 63 и нарисидә бала болуп, бу қәтлиамни  йүргүзгәнләрдин бири әрменийәниң һазирқи пирезиденти иди.»

әлийев хәлқаралиқ тәшкилатлар вә бирләшкән дөләтләр тәшкилати хәвпсизлик кеңишиниң әрменийәниң ишғалийитигә хатимә бериш тоғрулуқ көплигән қарарларни чиқарғанлиқини тәкитләп мундақ деди: «һалбуки, әрменийә бу қарарларни көзгә илмайватиду. бәзидә бирләшкән дөләтләр тәшкилати хәвпсизлик кеңишиниң қарарлири бирқанчә күн ичидә иҗра қилиниду. әмма биздә болса уда 24 йилдин буйан иҗра қилинмайватиду. бу  қош өлчәм болуп, қобул қилиш әсла мумкин әмәс. әрменийәгә ембарго йүргүзүлүши керәк.»

әрменийә армийәсиниң 2016 – йили апрелда 6 әзәрбәйҗан пуқрасини қәтл қилғанлиқини әскәрткән әлийев сөзлиригә мунуларни  илавә қилди: «буниңға асасән әзәрбәйҗан армийәси дәрһал һәрикәткә өтүп, ишғал астидики районларниң бир қисмини азад қилип, әзәрбәйҗан байриқини ләпилдәтти. әрменийә һөкүмити бу савақни һәргизму есидин чиқирип қоймаслиқи лазим. ундақ болмиған тәқдирдә, кейинки иғвагәрликниң җаваби техиму еғир болиду. әзәрбәйҗан мәсилиниң тинч йол билән һәл қилинишини халайду, бирақ әрменийә тәрәп һәрбий иғвагәрчиликини изчил давамлаштурса, әзәрбәйҗанниң өз хәлқини қоғдаш вә йәнә әрменийәни җазаландуруш һоқуқи һәм күчи бар.»