2-qétimliq uyghur mutepekkurlarni xatirilesh yighini istanbulda ötküzülidu

türkiye awazi radiyosi xewiri: 6-may (shenbe) küni uyghur akadémiyesining sahibxanliqida 2-qétimliq «uyghur mutepekkurlarni xatirilesh ilmiy muhakime yighini» istanbulda échilidu. bu qétimliq yighinda, molla musa sayrami (1917-1836) wapatining 100-yili, hüseyinxan tejelli (1927-1848) wapatining 90-yili, qutluq shewqi (1937-1876) wapatining 80-yili we abduqadir damolla (1924-1862) tughulghanliqining 155-yilliqi ilmiy doklatlar bilen xatirilinidu.

yighin chüshtin kéyin saet 14:00 de fatih sultan mehmet wexpe uniwérsitéti topkapi mewlewixanisining yighin zalida bashlinidighan bolup, yardemchi dotsént doktor meghpiret kamal «qutluq shewqi we uning paaliyetliri» témisida؛ yardemchi dotsént doktor rahile qeshqiri «hüseyinxan tejellining hayat hikayisi we ilmiy emgekliri» témisida؛ uyghur ana til maaripi teshebbuschisi abduweli ayup ependi «bügünki oqurmen we tarixiy hemidi-molla musa sayrami» témisida؛ trakya uniwérstéti tarix penliri doktor aspiranti ömerjan jamal «abduqadir damolla we islahatliri» témisida ilmiy doklat sunidu.

uyghur akadémiyesining bu yilqi «uyghur mutepekkurlarni xatirilesh ilmiy muhakime yighini» 2009-yili 5-maydin bashlap weten ichi we sirtida tebriklinishke bashlighan «uyghur doppa medeniyet bayrimi» gha toghra kelgenliki üchün, uyghur doppa medeniyiti toghrisida shiwétsiyede yashawatqan musteqil tetqiqatchi abdushükür muhemmet bilen uyghur akadémiyesining reisi abdulhemit qaraxan ependi «uyghurlarning bash kiymi medeniyitide doppa» témisida léksiye sözleydu.

uyghur akadémiyesining reisi abdulhemit qaraxan ependi 2-nöwetlik «uyghur mutepekkurlarni xatirilesh ilmiy muhakime yighini» heqqide toxtilip, bu paaliyetlerning uyghur yashlirining milliy kimlikini we millet söygüsini kücheytishte zor ehmiyetke ige ikenlikini éytti. u: «hazir uyghurlar nahayiti sezgür bir waqitta turuwatidu. uyghur akadémiyesi bolush süpitimiz bilen, uyghurlarning tarixini we tarixiy shexsiyetlirini chüshinish arqiliq meniwi hayatimizni béyitip, milliy rohimizni kücheytishni asasiy meqset qiliwatimiz» dédi.

uning bildürüshiche, 2016-yili 15-mayda échilghan 1-nöwetlik «uyghur mutepekkurlarni xatirilesh ilmiy muhakime yighini» da, yüsüp xas hajip, ehmet yesewi, elishir newai, abduxaliq uyghur we memtili tewpiq qatarliq uyghur tarixidiki muhim shexsler xatirilengen.

uyghur akadémiyesining bu yilqi yighinida xatirilinidighan «uyghur doppa medeniyet bayrimi», ürümchidiki ijtimaiy paaliyetchi tahir imin ependining tirishchanliqi we munasiwetlik uyghur rehbiri kadirlar, yazghuchilar, ziyaliylar we karxanichilarning yéqindin qollishi bilen, bir qétimliq keng kölemlik yighin uyushturulup, 2009-yili 5-may élan qilinghan. shuningdin kéyin, uyghur éli we sirtida tebriklinip kelmekte.

2013-yilidin bashlap enqerede yashawatqan uyghurlarmu «uyghur doppa medeniyet bayrimi» ni tebriklep kelmekte.