musulmanche isim qoyushning cheklengenliki toghrisidiki xewer türkiye metbuatida keng orun aldi

türkiye awazi radiyosi xewiri: uyghur élide musulmanche isimlarning cheklengenliki toghrisidiki xewer türkiyediki «hürriyet», «posta», «qarar», «yéngi shepeq», «yeni akit», «milliy gazete», «türkiye géziti», «star», «axsham»... dégendek her qaysi gézitlerde, radiyo - téléwiziye qanalliri we médiya, élan orgini dégendek idare – organlarning tor betliride keng orun aldi.

médiya, élan orginining bu heqtiki xewiride, xitay dairilirining uyghur éli ahalisining perzentlirige «muhemmed, aishe, patime, xediche, mujahid, jihad, talip, imam, muslime, sumeyye, nesrullah, türknaz, türkizat, haji, erepat, medine, shemsidin, seypulla, abduleziz, sadam, bin ladin, esedullah, muxlise» qatarliq isimlarni qoyushini meni qilghanliqini yazdi.

xewerde, amérika uyghur jemiyitining reisi ilshat hesenning qarargha «exmiqane» dep baha bérip, balilargha diniy yaki étnik isim qoyushning tolimu normal kishilik hoquq mesilisi ikenlikini eskertkenlikini we buning xitayning uyghurlargha qaratqan assimilyatsiye siyasitining namayendisi ikenlikini éytqanliqigha isharet qilindi.

türkiyening aldinqi qatardiki gézitlirining biri bolghan «hürriyet», «xitay musulmanche isimlargha cheklime qoydi» serlewhilik xewirige, xitay teripidin élan qilinghanliqi ilgiri sürülgen uyghurche–xitayche yézilghan cheklengen isimlar tizimlikining süritinimu qoshup élan qildi.