мәзлумларниң дости йазиҗиоғлу йад етилгән түрк дунйаси йиғинға уйғурларму қатнашти

түнүгүн әнқәрәдә «түрк дунйаси вә бирлик»темисини чөридигән һалда 8-нөвәтлик хәлқара муһсин йазиҗиоғлу сөһбәт йиғини өткүзүлди.

699349
мәзлумларниң дости йазиҗиоғлу йад етилгән түрк дунйаси йиғинға уйғурларму қатнашти

 түнүгүн әнқәрә сода-санаәт бирләшмиси йиғин залида «түрк дунйаси вә бирлик»темисини чөридигән һалда 8-нөвәтлик хәлқара муһсин йазиҗиоғлу сөһбәт йиғини өткүзүлди.

бүйүк бирлик партийәси, муһсин йазиҗиоғло чүшәнчә вә истиратегийәлик тәтқиқат җәмийити вә алпәрән оҗақлири қатарлиқ орунлар тәрипидин уйуштурулған бу қетимқи сөһбәт йиғини барлиқ шеһитлар үчүн сүкүттә туруш вә истиқлал маршиниң оқулуши билән башлиди. арқидин қурани-кәрим тилавәт қилинип, мәрһум йазиҗиоғлу вә шеһитләргә атап дуа оқулди.

сөһбәт йиғинида сөз қилған бүйүк бирлик партийәси башлиқи дәстәҗи  мәрһум муһсин йазиҗилоғлуни рәһмәт, шүкүр вә миннәтләр билән чоңқур йад етидиғанлиқлирини, рәһмәтликниң ғайә вә арзу-арманлириниң түркийә чегралири биләнла чәклинип қалмайдиғанлиқини ейтип униң ғайисиниң «түрк вә ислам дунйасиниң бирликини бәрпа қилиш»икәнликини алаһидә әскәртти.

дәстәҗи униң ғайиси үстидә тохтилип мунуларни деди: «рәһмәтлик адрийатиктин сәддичил сепилиғичә бир-биригә мәһкәм бағланған бирлик ичидики түрк дунйасини хийал қилимән, дәйтти.»

түрк дунйасиниң динда, пикирдә вә ишта бирлик бәрпа қилиш үчүн һәрикәт қилиши керәкликини ейтқан мустафа дәстәҗи, муһсин йазиҗиоғлуниң боснийә - гертсеговина , әзәрбәйҗан, қирим,пәләстин вә башқа җайлардики барлиқ мәзлумлар билән бир сәптә туруп кәлгәнликини билдүрди.

муһсин йазиҗиоғло чүшәнчә вә истиратегийәлик тәтқиқат җәмийити башлиқи пирофессор доктор орһан кавунҗуму сөз қилип, йазғучи чеңгиз айтиматовниң мәлум бир романида тилға алған «маңқурт»идийәси билән түрк дунйасида бирликниң бәрпа қилиналмайдиғанлиқи тоғрулуқ мәрһум йазиҗиоғлуниңму көз-қарашлириниң барлиқини билдүрүп мунуларни деди: «күнимиздики маңқуртлар ким? кимликидин йирақлишип кәткән, чәт әлликләргә чоқунидиған, өзлириниң мәниви қиммәт байлиқлириға йат кишиләрдур.»

бу қетимқи сөһбәт йиғинға дөләт рәһбәрлири, парламент әзалири, академикләр, тәтқиқатчилар  вә чәт дөләтләрдин муһим шәхсләрму иштирак қилди. җүмлидин бу қетимқи сөһбәт йиғиниға уйғурларму қатнашти, сөһбәт йиғинида түрк дунйасиниң кәчмиши, нөвәттики әһвали вә келәчики, шундақла түрк дунйаси дуч келиватқан қийинчилиқ вә мәсилиләр тоғрулуқ  илмий доклатлар оқуп өтүлди.  йиғинға тәклип билән қатнашқан әнқәрә университети иҗтимаий пәнләр иниститути һазирқи заман түрк шивилири вә әдәбийатлири бөлүми оқутқучиси дотсент доктор әркин әмәт «муһсин йазиҗиоғлониң уйғур давасиға көрсәткән тәсирлири»тоғрулуқ илмий доклат бәргән болса,түркийә вә чәт әлдики уйғурлар арисида шиир диклиматсийә қилиш җәһәттә көзгә көрүнгән, оқуған шиирлиридә чоң вә улуғвар ишларға хитап қилисиму, лекин сәбийлики билән башқиларниң қәлб төридин орун алған кичик муҗаһитму мәшһур түрк шаири ариф ниһат асйаниң «дуа»шиирини оқуп йиғин әһлиниң алқишиға еришти.

сөһбәт йиғини ахирлашқандин кейин йиғин әһилилири хатирә сүрәткә чүшүп ихтийари сөһбәт өткүзди.



مۇناسىۋەتلىك خەۋەرلەر