әрдоған билән әлийев: биз бир милләт икки дөләтимиз

түркийә авази радийоси хәвири: җумһур рәис рәҗәп таййип әрдоған бирләшкән дөләтләр тәшкилати мәдәнийәтләр иттипақи 7-нөвәтлик дунйа мунбиригә иштирак қилиш үчүн йетип барған әзәрбәйҗанда, пиризедент илһам әлийев билән көрүшти.

загулба пиризедентлиқ сарийда ишқа ашқан көрүшүштә, әрдоған билән әлийев икки дөләт оттурисидики истиратегийәлик һәмкарлиққа тайанған достлуқ вә қериндашлиқ мунасивәтлириниң барлиқ саһәләрдә муваппиқийәтлик һалда тәрәққий қиливатқанлиқидин толиму хурсән икәнликлирини билдүрүшти.

дөләт рәһбәрлириниң изчил алақә ичидә болушлириниң мунасивәтләрниң тәрәққийати нуқтисидин муһим рол ойнайдиғанлиқини тәкитләп өткән рәһбәрләр, мунасивәтләрниң буниңдин кейин техиму күчийидиғанлиқиға чоңқур ишинидиғанлиқлирини тәкитләшти.

б д т мәдәнийәтләр иттипақи 7-нөвәтлик дунйа мунбириму кеңәш қилинған көрүшүштә, бу қетимқи паалийәтниң хәлқаралиқ һәмкарлиққа зор пайдиси тегидиғанлиқи билдүрүлди.

әрдоған вә әлийев түркийә билән әзәрбәйҗан һәмкарлишип елип бериватқан анадолу тәбиий газ турубба линийәси лайиһәси болуп енергийә саһәсидики барлиқ һәмкарлиқни күчәйтиш мәсилиси билән тағлиқ қарабағниң нөвәттии вәзийити үстидиму кеңәш қилип, «бир милләт, икки дөләт» чүшәнчисини тәкитлиди.

икки рәһбәрниң көрүшүши ахирлашқандин кейин, әлийев әрдоғанниң шәрипигә зийапәт бәрди. пиризедент әрдғоғанниң рәпиқиси әминә әрдоған билән әлийевниң рәпиқиси миһрибан әлийевму иштирак қилған зийапәт тәхминән бир йерим саәт давамлашти.