bay nahiyesidin ghayet zor bayliq tépildi

melumatlargha qarighanda, xitay géologiye téxnika xadimlirining 3 yilgha yéqin tekshürüshi netijiside uyghur élining jenubigha jaylashqan bay nahiyesidin kemdin - kem uchraydighan ghayet zor qimmetlik métal tentalum-niyobiyum (tantalum-niobium ores) kan yatmisi bayqalghan bolup, mölcherlinishiche, nyobiyum zapisi 100 ming tonnidin, tentalum zapisi 10 ming tonnidin ashidiken, buningdin bashqa, yene gafniy qatarliq nahayiti az uchraydighan qimmetlik métallarmu bar iken.

xitay giologiye-téxnika merkizi kan bayliqliri tetqiqat bashqarmisining bashliqi, aliy derijilik inzhénér shü xeyming (徐海明) ning éytishiche, xitay hazirghiche bayqighan, ishletkili bolidighan niyobiyum zapisi aran 80 ming tonna iken, bay nahiyesidin tépilghan tentalum-niyobiyum zapisining miqdari xitay tekshürüp chiqqan omumiy niyubiyum zapas miqdaridin artuq hemde alahide zor kölem derijisige yetken bolup, omumiy qimmiti 130 milyard yüendin ashidiken. igilinishiche, mezkur kan yatmisi bay nahiyesining 47 kilométir shimaligha jaylashqan tengritaghning ichkirisidiki bozughur taghliq rayonigha jaylashqan bolup, déngiz yüzidin égizliki 3860 métirdin 4100 métirghiche kélidiken.