مباپپې: ئاپەت رايونىدىكى بالىلارغا ياردەم قىلىش ئۈچۈن قولۇمدىن كېلىشىچە تىرىشچانلىق كۆرسىتىمەن

تۈركىيە ئاۋازى رادىيوسى خەۋىرى: پارس سائىنت گېرمان كوماندىسىنىڭ ماھىر پۇتبولچىسى كيلىئان مباپپې تۈركىيەدىكى تەنتەربىيە قاناللىرى ھەمكارلىشىپ ئورۇنلاشتۇرغان «مۈرىنى مۈرىگە تېرەپ» يەر تەۋرەشنىڭ زەربىسىگە ئۇچرىغانلارغا ياردەم توپلاش سەپەرۋەرلىك پائالىيىتىگە تېلېفون قىلىپ كۆڭۈل سۆزلىرىنى ئورتاقلاشتى.

تۈركىيەدىكى تەنتەربىيە قاناللىرىدا بىردەك بىۋاسىتە ئۇلاپ تارقىتىلغان پىروگىراممىغا سىن كۆرۈنۈشلۈك تېلېفون قىلغان فىرانسىيەلىك پۇتبولچى مباپپې: «بالىلارنىڭ ئارزۇسى مەن ئۈچۈن ئىنتايىن مۇھىم. مەن قولۇمدىكى بارلىق ۋاسىتىلەردىن پايدىلىنىپ، ئۇلارغا ياردەم قىلىمەن» دېدى.

ئىجتىمائىي تاراتقۇدىكى ئادرېسىدا تۈركىيە بايرىقىنى ھەمبەھرىلىگەن مباپپې سۆزىنى داۋاملاشتۇرۇپ: «مەن فىرانسۇزچە سۆزلەشنى تاللىدىم. بۇ ناھايىتى ئېغىر تىراگېدىيە. بۇ بىز تەسەۋۋۇر قىلالمىغۇدەك دەرىجىدە چوڭ ئىش ئىدى. تۈركىيەنىڭ قانداق ئازاب چەككەنلىكىنى تەسەۋۋۇر قىلالمايمەن. مەن بۇ تۈرنىڭ بىر قىسمى بولغانلىقىمدىن پەخىرلىنىمەن. بالىلارنىڭ ئارزۇسى مەن ئۈچۈن ئىنتايىن مۇھىم. مەن قولۇمدىكى بارلىق ۋاسىتىلەردىن پايدىلىنىپ، ئۇلارغا ياردەم قىلىمەن. تۈركىيە ئۈچۈن ھەممە ئىش تېخىمۇ ياخشى بولىدۇ» دېگەنلەرنى قەيت قىلدى.