شىمالىي كورېيە توكيو ئولىمپىك مۇسابىقىسىگە قاتناشمايدىغانلىقىنى ئۇقتۇردى

تۈركىيە ئاۋازى رادىيوسى خەۋىرى: كىيودو ئاگېنتلىقى، شىمالىي كورېيەنىڭ 7 - ئايدا ئۆتكۈزۈلۈشى پىلانلىنىۋاتقان توكيو ئولىمپىك تەنھەرىكەت مۇسابىقىسىدىن چېكىنىپ چىققانلىقىنى ئۇقتۇرغان تۇنجى دۆلەت بولغانلىقىنى خەۋەر قىلدى.

شىمالىي كورېيە ئولىمپىك كومىتېتى، قارارنىڭ تەنھەرىكەتچىلەرنى كوۋىد  - 19 يۇقۇمىدىن ساقلاش مەقسىتىدە چىقىرىلغانلىقىنى ئۇقتۇردى.

توكيو ئولىمپىك مۇسابىقىلىرىنى رەتلەش - ئورۇنلاشتۇرۇش كومىتېتى ئەمەلدارى شىمالىي كورېيەنىڭ قارارى توغرىسىدا توختىلىپ: «پەرەز قىلمىغاندۇق، تۇيۇقسىزلا ئېلان قىلىندى» دېدى.

جەنۇبىي كورېيە بىرلىككە كەلتۈرۈش مىنىستىرلىقىنىڭ باياناتىدا بولسا: «ھۆكۈمىتىمىز توكيو ئولىمپىك تەنھەرىكەت مۇسابىقىسىنىڭ كورېيەلىكلەرنىڭ ئۆزئارا ئۇيۇشۇشچانلىقى ۋە ھەمكارلىقىنى كۈچەيتىش بىلەن بىرگە كورېيە يېرىم ئارىلىدا تىنچلىق ئورنىتىش ئۈچۈن بىر پۇرسەت بولۇشىنى ئۈمىد قىلىدۇ» دېگەن ئىبارىلەرگە ئورۇن بېرىلدى.

ئىلگىرى 2020 - يىلى 7 - ئاينىڭ 24 - كۈنىدىن 8 – ئاينىڭ 9 - كۈنىگىچە ئۆتكۈزۈلمەكچى بولغان بولسىمۇ يۇقۇم سەۋەبىدىن كېچىكتۈرۈلگەن 2020 - يىللىق توكيو ئولىمپىك تەنھەرىكەت مۇسابىقىسىنىڭ 2021 - يىلى 23 - ئىيۇلدىن 8 - ئاۋغۇستقىچە ئۆتكۈزۈلۈشى قارار قىلىنغانىدى.