дунйа путболчилиқи матәмдә...

түркийә авази радийоси хәвири: путбол тарихида исмини алтун һәрпләр билән йазған аргентинаниң даңлиқ путболчиси дийигоармандо марадона (Diego Armando Maradona) йүрәк кесили сәвәбидин, бу дунйа билән хошлашти. у арқисида 60 йиллиқ рәңдар гүзәл әслимиләрни вә бәзидә йуқири пәллигә йәткән, бәзидә төвәнлигән мувәппәқийәт һекайилирини қалдуруп кәтти.

марадона 1960-йили 30-өктәбир дунйаға кәлди. у путбол ойнашни аргентино зонийорс (Argentinos Juniors) та башлиди. 1982-йили рекорт сәвийәгә йәткән һәқ билән барселона командисиға кирди. икки йил каталонийә әтритиниң формисини кийди вә арқидин даңлиқ маһирға айлинидиған наполи (Napoli) командисиға алмашти. кулуб алмашқанда, һәққи икки қетим рекорт бузған бирдинбир путболчи болуп қалди. у наполи командисидики вақтида, команда икки қетим чемпийон болди. 1986-йили дунйа лоңқисиниң йултузиға айланди. шу йили дунйа лоңқисиниң чарәк һәл қилғуч мусабиқиси, марадона үчүн алаһидә әһмийәтлик болди.

у әнглийә командисиниң варатасиға, шу вақитқичә дунйа лоңқисида варатаға әң чирайлиқ киргүзүлгән вә әң қаттиқ талаш-тартиш қозғиған топларни тепип киргүзди. «тәңриниң қоли» дәп нам берилгән бу топлар, дунйа путболчилиқида узунғичә муназирә қозғиди. униң әнглийә варатасиға киргүзгән иккинчи топи «йүз йилниң топи» болуп баһаланди.

1990-йили өткүзүлгән дунйа чемпийонлуқи, марадона үмидсизликкә толған мусабиқә болди. аргентина командиси германийә командисиға уттуруп қойди, марадона көз-йашлирини туталмиди.

даңлиқ путболчи пили (Pele) ға охшаш йүз йилниң путболчиси болуп баһаланған марадона, аргентина дөләтлик командиси қатнашқан 91 мусабиқидә, қарши тәрәпниң варатасиға 34 топ киргүзди.

у путбол ойнаштин чекингәндин кейин, техника мәшқавули болуп хизмәт қилди. 2010-йили өткүзүлгән дунйа лоңқисида, аргентина командисиниң мәшқавули болған иди.

дунйадики әң даңлиқ путболчиларниң бири болған марадона үчүн аргентинада үч күнлүк матәм елан қилинди.