sepername (02)
istanbul ayrodorumida bir istakan chayning harariti

sepername (02)
essalamu eleykum men seyran. aldinqi pirogrammimizda, öz dölitimdin türkiyege ayropilan bilen kélishimni sözlep bergen idim. türkiye sepirim jeryanida, téxi ayropilanning ichidila kültür bayqashni bashlighan idim. türkiye hékayem istanbul ayrdorumigha qedem basqinim bilen heqiqiy menide bashlandi...
**** **** **** **** ***** ***
ayropilanimiz türkiye waqti 14:45 de istanbul ayrodorumigha qondi. bundaq chong we zamaniwi ayrodorumni ilgiri körüp baqmighan idim. ayropilandin chüshkendin kéyin, aptobus bilen términalgha qarap uzun bir yol yürduq. ayrodorumning kirish éghizigha kelginimizde, yoghan eynek tamlar we közni qamashturidighan mémarchiliqi méni meptun qildi. xuddi kelgüsining bir parchisidek idi. ichige qedem qoyghinimda, keng we ochuq bir muhitqa duch keldim. toruslar shundaq égiz idiki, özümni bir katédralda méngiwatqandek hés qildim. éléktronluq taxtaylar, renglik chiraghlar bilen bézelgen yoluchi uchur ékranliri, yüzligen qatnashlar... hemme nerse nahayiti janliq körünetti, hem yene tertiplik we teshkillik idi.
ayropilanda tonushqan günesh xanim bilen birlikte bashqa yoluchilarni we belgilerni teqip qilip pasport tekshürüsh munbirige yüzlenduq. nöwet kütüp turghan waqtimda, bundaq keng bir jaydiki tertip we intizam heqiqeten méni tesirlendürdi. pasport tekshürüshtiki xadim siliq-sipaye halda türkiyege kélish meqsitimni soridi. men «sayahetchi, bu güzel döletni bayqimaqchimen» dédim. u külümsirep turup tamgha bésip, pasportumni sunghanda, «dölitimizge xush kepsiz» dédi. shu chaghda, bu illiq qarshi élish méni heqiqeten xushal qildi. günesh xanimning ishliri tügigiche saqlap turdum. kéyin yük-taqlirimizni élishtin burun, ayrodorumni sel aylinip, birer istikan chay ichishni qarar qilduq.
**** **** ** **** ***
bir mezgil etrapni aylanduq. zamaniwi senet eserliri, xelqaraliq markilarning dukanliri we her xil taamlarni teqdim qilidighan réstoranlar méni meptun qildi. bolupmu jimjit öyler, dem élish rayonliri we balilar oyun meydanlirigha oxshash tepsilatlar, bu yerni addiy bir ayrodorumdin téximu köp qimmetliq jaygha aylandurghan idi. günesh xanim, istanbul ayrodorumning 2018-yili échilghanliqini we dunya miqyasida diqqet tartqan bir layihe ikenlikini sözlep berdi. yawropa teripige jaylashqan bu ayrodorumning mémarchiliqi, sighimi we téxnikiliq asasi qurulmisi bilen hawa qatnishi saheside muhim orungha ige ikenlikini éytti.
söhbitimiz mundaq dawamlashti: «istanbul ayrodorumi dunyaning her teripige biwasite uchushlar bilen asiya, yawropa we afriqining tügün nuqtisigha jaylashqan bir uchrishish nuqtisigha aylandi. bügün yüzligen hawa yolliri we onlighan oxshimighan yönilishler bilen xelqaraliq yoluchilarning yaxshi köridighan makani. emma bu yer peqet bir ayrodorumla emes؛ bir inzhénérliq möjizisi, medeniyetlerni birleshtüridighan bir köwrük we türkiyening dunyagha échilidighan küchlük yüzi.»
*** ***** ***** **** *******
aylinip bolghandin kéyin bir qehwexanida olturup chay ichishni qarar qilduq. günesh xanim bolupmu chaylirimizning inchike bellik istakanda sunulushini telep qildi. qisqa waqit ichide, petnusta qizil yaldizliq texsilerde inchike bellik istakanlarda chaylirimiz keldi. yénida zenjiwillik pirenikler bar idi. günesh xanim chay istakinini qoligha élip külümsirep mundaq dédi: «inchike bellik istakandiki chay türk medeniyitining illiq bir simwoli. qoshnidarchiliq, dostluqning ortaq tili. yéza meydanliridin sheher kochilirighiche, kishiler chayning etrapida toplishidu؛ paranglar chongqurlishidu, rishtiler küchiyidu. bu istakan peqet chaynila emes, uning renggini, hararitini we semimiylikinimu eks ettüridu. 'yene bir istakan ichemsen?' dégen soal emeliyette 'birdem yene tur, birdem yene paranglishayli' dégenliktur. inchike bellik istakandiki chay, kishilerni bir yerge keltüridighan we rishtilerni kücheytidighan bir medeniyet köwrükidur.»
menmu istakanni qolumgha élip oylandim. peqet bir istakan chaydek körünsimu, emeliyette bu döletning medeniyitining illiq bir parchisi idi. chay peqet bir ichimlikla emes؛ dostluqning, méhmandostluqning we ortaqlishishning simwoli idi. bu semimiy parangdin kéyin, yük-taqilirimizni alidighan yerge qarap mangduq.
*** **** *****
hörmetlik tingshighuchilirimiz! kéyinki qisimda, istanbulgha tunji qétim qedem basqan we bu séhirlik sheherni yéqindin körgen chaghdiki untulmas deqiqilerni ortaqlishimen. hazirche xoshlishayli! qayta körüshkiche aman bolghaysiler!