edirne irimchiki

ilker tashqin teripidin teyyarlanghan «türkiyening rayonlargha xas tizimgha élinghan mehsulatliri» namliq sehipimizning bu heptilik sanida, «edirne irimchiki» ni tonushturimiz.

«edirne irimchiki» ning türkiyening rayonlargha xas mehsulatliri tizimlikige kirgüzülgen waqti: 10.05.2004

****** **** *** *** ****

türkiyening gherbke échilghan derwazisi edirne shehirining nami bilen atalghan, qoy, öchke we kala sütining arilashmisidin yasilidighan «edirne irimchiki» sheherlik tijaret we sanaet uyushmisining iltimasi bilen 2004-yili türkiyening rayonlargha xas mehsulatliri tizimlikige kirgüzülgen idi.

edirne irimchiki tunja, merich, arda we ergene deryalirining déltalirida ösken tebiiy ösümlükler bilen ozuqlinidighan charwa mallirining sütidin yasilidighan bolghachqa özgiche puraq we temge ige.

edirne irimchiki sériqsiman aq renglik bolup, qaymaqqa oxshash qurulmigha ige. tatliq, tuzluq we azraq achchiq temlerni öz ichige alidu. bu irimchikning yasilishida peqet süt, tebiiy échitqu we déngiz tuzi ishlitilidu. irimchikni yasashta ishlitilidighan süt deslepte 65 gradus témpératurida qaynitilidu, andin sowutulup échitqu qoshush jeryani bashlinidu. échitilghan yérim pishshiq irimchik parchiliri téximu kichik parchilargha bölünüp, süyining süzülüshi üchün pirislinidu. irimchikning yumshaqliqi we qattiqliqi pirislinish waqtigha asasen her xil bolidu.

qétishqan parchilar xalighan pishshiqliqqa yetkende, qélip sheklide késilip, üstige ottura derijilik tuz éritmisi qoshulup 16 saet saqlinidu. andin qutilargha sélinip, üstige tazilanghan déngiz tuzi sépilip 24 tin 30 saetkiche yene saqlanghandin kéyin, 18 kilogramliq tunglargha qachilinidu. qachilashtin kéyin tunglarning aghzi hawa kirmeydighan qilip étilip, soghuq saqlash ambarlirigha ewetilidu. soghuq muhitta yene eng az  dégendimu 90 kün pishurulghan irimchik istémal qilishqa teyyar halgha kélidu.

yuqirida «türkiyening rayonlargha xas tizimgha élinghan mehsulatliri» namliq pirogrammimizni anglidinglar!