türkiyening néfit ishlepchiqirish nishani zoraymaqta

türkiye awazi radiyosi: türkiye néfit ishlepchiqirishta tarixiy sewiyelerni qolgha keltürdi؛ kündilik ishlepchiqirish miqdari 100 ming warildin éship ketti. türkiyediki tunji bayqash 1940-yili batmandiki raman -1 néfitlikide bayqalghanidi. nöwette türkiyede 6 minggha yéqin néfit quduqi bar. nöwettiki tekshürüsh netijisige qarighanda, türkiyening 1 milyard 300 milyon tonna néfit zapisi bar. emma, eng köp néfit gabarda ishlepchiqirilmaqta. shéhit aybüke yalchin we shéhit esma chewik néfitlikidiki kündilik néfit ishlepchiqirish miqdari 40 ming warildin éship ketti.

türkiyening 2024-yilidiki  yéngi nishani néfit ishlepchiqirishini aldi bilen 150 ming warilgha, arqidin 200 ming warilgha yetküzüsh. türkiye néfit cheklik hessidarliq shirkiti shéhit aybüke yalchin néfitlikidiki yéngi bayqalghan néfitning omumiy zapisini texminen 1 milyard waril, ishlepchiqirish zapisini texminen 600 milyon waril dep mölcherlimekte.

gerche shirnaq nöwette ishlepchiqirishta muhim orunni igilewatqan bolsimu, uning qisqa muddet ichide yenimu kéngeytilishi kütülmekte.

ötken yili 214 yéngi quduqta burghilash paaliyiti bashlandi. néfit ishlepchiqiriliwatqan quduqlarning sani 2 minggha yetti. lékin bular peqet bashlinish dep qaralmaqta. aldi bilen, hakkari we wanda nahayiti qisqa waqit ichide yéngi burghilash paaliyetliri bashlinidu. uninggha egiship, 14 wilayettiki 18 orunda néfit charlash paaliyiti bashlinidu؛ bu wilayetler ghaziantep, antalya, chanaqqele, shanliurfa, zonguldaq, diyarbakir, bartin, qarabük, kastamonu, elazigh, edirne, qahramanmarash we kilis qatarliqlar.

ishlepchiqirishning éshishigha egiship, türkiye aldi bilen néfit éhtiyajining %20 tini türkiyening yerlik zapasliri arqiliq qandurushni pilanlimaqta. bolupmu nöwettiki hésabat qizil reqimini taqash jehette néfit ishlepchiqirish intayin muhim orunda turidu؛ yéngi bayqashlarning türkiye iqtisadigha qoshidighan yilliq töhpisining 3 milyard dollardin éshishi mölcherlenmekte.

gabargha néfit turubisi yatquzulmaqta

gabardin chiqirilghan néfitni sistémigha téximu téz yötkeshke kapaletlik qilidighan ul eslihe xizmetliri üzlüksiz dawamlashmaqta. rayonda hazirgha qeder 480 kilométir uzunluqta tashyol yasaldi. uningdin bashqa, turuba yoli arqiliq botashning idil ponkitigha néfit yetküzüsh xizmiti dawamlashmaqta. bu liniyening yérimidin köprekining tamamlanghanliqi bildürülmekte. néfitning idil néfit ponkitidin jeyhan we dörtyolgha yetkülüshimu éksport qilinishi nuqtisidin intayin muhim.