дунйаниң түркийәдики икки мөҗизиси

қәдимки дунйаниң йәттә мөҗизисидин иккисиниң түркийәдә икәнликини биләмсиз?

«йәттә» дегән сан, қәдимки дәврдики бәш сәййарә, қуйаш вә айниң йиғиндиси болғачқа, гиретсийәликләрниң нәзиридә бәрикәт вә мукәммәлликини ипадиләйду, һәмдә бу сан муһим тизимликләрдә һәмишә асаслиқ орунда туриду. булардин бири, дунйадики 7 мөҗизә тизимлики болуп, килассик қәдимки дунйаниң тунҗи вә әң диққәт қозғайдиған үлгисини тәшкил қилиду. қәдимки дәврләрдин тартип һазирғичә ақдеңиз әтрапидики дунйаниң әң һәйвәтлик тәбиий вә сүний гүзәлликлири арисидин таллинип түзүлгән бу тизимликтики йәттә мөҗизәдин иккиси анадолуға җайлашқан.

түркийәдики қәдимки дунйаниң мөҗизилири арисидики икки мөҗизәдин бири, «артемис ибадәтханиси» дур. измир вилайитиниң сәлчуқ наһийәсигә, қәдимки әфәс шәһиридин тәхминән 4 километир йирақлиққа җайлашқан бу ибадәтхана, миладидин илгирики 550-йили селинған. пүтүнләй мәрмәр таштин йасалған вә йасашқа 120 йил вақит кәткән «артемис ибадәтханиси» дин бүгүнки күндә пәқәт бир нәччә мәрмәр ташла сақлинип қалған.

түркийәдики қәдимки дунйаниң йәнә бир мөҗизиси болса «һаликарнас мәқбәриси» дур. бүгүнки күндә мәшһур сайаһәт райони болған бодрумниң чегралириға җайлашқан бу мәқбәрә, миладидин илгирики 350-йили йасалған. карийад падишаһи мавсолос үчүн айали вә сиңлиси тәрипидин йасалған бу мислисиз «һаликарнас мәқбәриси», чоң йәр тәврәштә вәйран болған. 15-әсирдә әһлисәлип урушлири җәрйанида бу районға кәлгән қошунлар «бодрум қәләси» ни салғанда, мәқбәрәниң парчилирини қәлә қурулушида ишләткән икән. шу вәҗидин,  «һаликарнас мәқбәриси» ниң харабилики асасий җәһәттин йоқап кәткән болуп, бу йәрни «дала  музейи» дәп қарашқа болиду. йадикарлиқниң бәзи парчилири болса әнгилийәдики «биританийә  музейи» да көргәзмә қилинмақта.