asmangha qarighinimizda, yultuzlarni emes süniy hemrahlarni köremduq?

«köznek» namliq sehipimizning bügünki sanida, yer sharigha yéqin süniy hemrahlarning ilmiy közitishler we astronografiye üchün saqliniwatqan mesilige aylinishqa bashlighanliqi toghrisidiki uchurlarni diqqtinglargha sunimiz!

1894245
asmangha qarighinimizda, yultuzlarni emes süniy hemrahlarni köremduq?

asmangha qarighinimizda, yultuzlarni emes süniy hemrahlarni köremduq?

türkiye awazi radiyosi: dunya nopusi we chong sheherlerning köpiyishige egiship peyda bolghan mesililerning biri nur bulghinishi bolup, u tebiiy halda asmanning arqa terep yoruqluqini ashuruwetti. netijide, chong sheherlerde yashaydighanlar pewquladde chaqnap turidighan yultuzlar, turghun yultuzlar, yer sharigha yéqin yerdiki bir qanche seyyare we ayni hésabqa almighanda, kéchisi normal közliri bilen asman jisimlirini körelmeydighan halet shekillendi.

ehwal mushundaq bolghachqa, chong sheherlerde saman yolini körüsh chüshke aylandi. bolupmu süniy hemrah téxnikisining hem dölet hem xususiylar igilikidiki sahelerde birdek tereqqiy qilishi, süniy hemrah bulghinishidin ibaret yéngi bir bulghinish türini otturigha chiqardi.

shundaq, hazirghiche dunyaning herqaysi jayliridin boshluqqa yollanghan süniy hemrahlar sani 11 mingdin, orbitisida ayliniwatqan süniy hemrahlar sani yette mingdin éship ketti. nöwette, bu süniy hemrahlarning  töt mingi aktip meshghulat élip bériwatqan bolsimu, qalghanlirining  beziliri kéreksiz nersiler süpitide boshluqta leylep yürmekte, yene beziliri yighiwélinidighan kéreksiz nersiler süpitide yer sharigha chüshürülüshini kütüp turmaqta.

sowét sotsiyalistik jumhuriyetler ittipaqi 1957 - yili tunji suniy hemrahi «sputnik-1»ni  boshluqqa qoyup bergendin buyan alem boshluqigha ilmiy tetqiqat, météorologiye, uchur – alaqe we herbiy ishlarda paydilinish meqsitide minglarche süniy hemrah qoyup bérildi. nöwette yer shari etrapida amérikaning  2027, xitayning 224, engliyening 129, rusiyening 83 we yaponiyening 82 süniy hemrahi bar.

süniy hemrahlar eng köp tesir körsitiwatqan ikki sahe, kichik seyyare (météorit) közitishliri bilen astronografiye (boshluq fotografchiliqi) sahesi bolup qaldi. gerche yer sharigha yéqin yerlerdiki süniy hemrahlarning boshluqni közitish xizmetlirige körsitiwatqan tesiridin saqlinishta paydilinishqa bolidighan, bashqiche éytqanda, süniy hemrahlarning ötüsh waqitlirini körsitip béridighan yumshaq détallar, tor béketliri we köchme epler bolsimu, sanliri künséri köpiyiwatqan süniy hemrahlar yüzisidin bu mesilini üzül – késil hel qilish qiyinlashmaqta. élon maskning «starlink» türi, dunyaning herqaysi jaylirini qaplaydighan intérnét mulazimiti bilen teminlesh üchün minglighan süniy hemrahni alem boshluqigha ewetishni pilanlimaqta.

yéqin musapilik süniy hemrahlarmu ilmiy közitishlerge tesir körsetmekte. alem boshluqi türkiyening erzurumda yasawatqan töt métirliq zor hejimlik téléskopigha oxshash muhim téléskoplar bilen üzlüksiz közitilmekte. bu közitishlerning beziliri kichik seyyarilerni közitishke merkezleshmekte؛ dunyaning her qaysi jaylirida yersharigha yéqin kichik seyyariler tekshürülüp, orbitiliri hésablanmaqta.

kichik seyyarilerning yer sharigha yéqin yerdin ötidighan – ötmeydighanliqi, ularning yer sharigha soqulup – soqulmaydighanliqi bu xil közitishler arqiliq hésablinidu. biraq, yer sharigha yéqin yerdiki süniy hemrahlar bu közitishlerge selbiy tesir körsitidu. amérika alem qatnishi we awiyatsiye idarisi — nasa, bu mesilini hel qilish meqsitide pilanéta mudapie maslashturush ishxanisi qurghanidi.

dunya miqyasida yéngidin otturigha chiqqan bu mesililerni hel qilish izdinishliri dawamlashmaqta.



مۇناسىۋەتلىك خەۋەرلەر