galata munari

istanbuldiki galata munarining dunyadiki eng qedimki munarlardin biri ikenlikini bilemsiz?

birleshken döletler teshkilati maarip, ilim-pen we medeniyet teshkilati (UNESCO) ning dunya medeniyet mirasliri tizimlikidin orun alghan we dunyadiki eng qedimki munarlardin hésablinidighan galata munari, istanbulning simwollirining biri bolup, istanbulning yawropa teripige, beyoghlu nahiyesidiki istanbul boghuzigha qaraydighan muhim orungha jaylashqan.

galata munari tunji qétim miladiye 508-yili wizantiye impératori jastinianos teripidin yasalghan. nurghun urushlargha shahit bolghan we ziyangha uchrighan bu munar, 1349-yili genewizlikler teripidin qayta yasalghan. 1500-yillardiki yer tewreshte ziyangha uchrighan we rémont qilinghan munarning üstünki qewitige 3 - sélim dewride bir shipang ilawe qilinghan. 1831-yili, munar yene bir qétim ot apitini bashtin kechürgen we rémont qilinghan. 2 - mehmud munarni yene ikki qewet yükseldürgen we munarning üsti kulah shekillik dangliq  ögze réshatkisi bilen qaplanghan. 1967-yili rémont qilinghan bu munar, axirqi qétim 2020-yili rémont qilinghan.

istanbulni esirler boyi zinnetlep kéliwatqan galata munari, eslide mayak munari süpitide yasalghan bolsimu, emma tarix boyiche zindan, resetxana we ot apiti munari qatarliq oxshimighan meqsetlerde ishlitilgen. jemiy 11 qewettin terkib tapqan munarning égizliki, yer yüzidin ögzining uchighiche 69 métir, yer meydani 208 kiwadrat métir kélidu. gerche uning layihelinishi addiy bolsimu, emma qurulushi intayin heywetliktur.

«istanbulda ziyarette qilishqa tégishlik jaylar» déyilgen haman tunji bolup ademning köz aldigha kélidighan jaylarning biri bolghan galata munari, bügünki künde  muzéy süpitide ishlitilmekte, hemde  yerlik we chet ellik sayahetchiler teripidin daim ziyaret qilinmaqta.