sinop

türkiyening eng shimaligha jaylashqan sinopning anadoluning eng qedimki sheherliridin biri ikenlikini bilemsiz?

sinopning tarixi shundaq uzun qedimki dewrlergiche sozuludiki, hetta ismi heqqide bir qanche hékayini anglash mumkin. bu hékayilerning birige qarighanda, bu sheherning ismi epsanilerde derya ilahi asoposning su perisi bolghan qizi sinopédin kelgen. hékayige qarighanda, sinopéni yaxshi körüp qalghan zéus, uningdin qorqqanliqi üchün, su perisini qaradéngizning jennetke oxshaydighan yapyéshil qirghaqlirigha tashlap qoyidu. ashu qirghaqlar bügün «sinop» dep atilidu. sinop heqqidiki yene bir hékaye shuki, bu sheherning ismi amazon xanishi sinowadin kelgen. epsanilerdinmu orun alghan bu güzel sheher, «qedimki dewr mutepekkurliridin biri bolghan diyojénning tughulghan yurti» depmu atilidu.

mislisiz tebiiy güzellikliri bilenmu körgenlerni meptun qilidighan sinop, qanche esirlerdin buyan port shehiri bolghan, hitit, frig, lidiya, pars, rim, wizantiye, selchuqiylar, jandaroghlu we osmanli impériyeliri qatarliq nurghun medeniyetlerge sahibxaniliq qilghan. tunji olturaqlishish waqti mis dewridin bashlanghan bu sheher, jughrapiyelik orni sewebidin qedimki dewrlerdin bashlapla soda merkizi bolup kelgen. qaradéngizgha hökümranliq qilmaqchi bolghan barliq qewmler sinopta olturaqliship, medeniyet yadikarliqlirini miras qaldurghan. sheherning mol tarixining izlirini hemme yerdin körgili bolidu.