бурсаниң тарихий үсти йепиқ базарлири

дидәм гүнәри

бурсада нәччә йүз йил илгири қурулған үсти йепиқ базарларниң һазирму мулазимәт қиливатқанлиқини биләмсиз?

османли империйәсиниң тунҗи пайтәхти болған бурсада, 14-әсирдә бир сода райони шәкиллинишкә башлайду. 16-әсиргә кәлгәндә, шәһәрдә көп санда өтәңләр вә үсти йепиқ базарлар қурулиду.

бурсадики уда 700 йилдин буйан «сода – тиҗарәт мәркизи» дәп тәриплинип кәлгән вә бирләшкән дөләтләр тәшкилати маарип, илим-пән вә мәдәнийәт оргини (UNESCO) ниң дунйа мәдәнийәт мираслири тизимликигә киргүзүлгән тарихий үсти йепиқ базар вә өтәңләр райони, бу шәһәрниң зийарәт қилишқа тегишлик муһим җайлиридин бири һесаблиниду.

30 ға йеқин өтәң вә үсти йепиқ базар ичидә, әң даңлиқлардин бири, бурса шәһириниң көз нури, дунйаға даңлиқ йадикарлиқ «коза өтиңи» дур. коза өтиңи бинаси, тик төт булуңлуқ һойлиниң әтрапида, икки қәвәт вә 95 һуҗридин тәркиб тапиду.

тарихий йипәк йоли сода линийәсиниң асийадики ахирқи бекити болған коза өтиңи, «йипәкчиләр базири» дәпму атилиду. бурсадики йипәк вә пилә қурти ишләпчиқириш мәркизи болған коза өтиңиниң һойлисида, содигәрләр 70-йилларғичә мәһсулатлирини көргәзмә қилаттикән, кәнттикиләрму халтилап әкәлгән пилә қуртлирини сетиш пурситигә еришәттикән. бүгүнки күндә, бу базар, үстүнки қәвитидики һәр хил йипәк мәһсулатлири сетилидиған дуканлар сайисида, сода - тиҗарәт һайатий күчини изчил сақлап кәлмәктә.