türkiye p y d|y p g gha izchil zerbe bermekte
küntertip we analiz:türkiyening térrorluqqa qarshi kürishi dawamlishiwatqan bir peytte, türkiye qisimliri we milliy istixbarat idarisi nurghun dölette herbiy heriket we nuqtiliq heriketlerni élip bérip, térrorluq teshkilatlirigha zerbe bermekte.
![türkiye p y d|y p g gha izchil zerbe bermekte](http://cdn.trt.net.tr/images/xlarge/rectangle/c2fc/c0e3/e670/611a43f2a94d8.jpg?time=1713951648)
türkiye awazi radiyosi: türkiyening térrorluqqa qarshi kürishi téz sürette dawamlishiwatqan bir peytte, türkiye armiye qisimliri we milliy istixbarat idarisi nurghun dölette birla waqitta herbiy heriketler we nuqtiliq heriketlerni élip bérip, térrorluq teshkilatlirigha zerbe bermekte. biraq, yéqinqi künlerde, bolupmu süriyede muhim herbiy heriketler élip bériliwatqan bolup, térrorluq teshkilati p k k ning süriyediki qolchumaqchisi p y d|y p g gha éghir zerbe bérildi.
p y d|y p g amérikaning qoghdishi astida süriyediki mewjutluqini dawamlashturuwatqan bolsimu, türkiye bu teshkilatni ünümlük halda zerbe nishani qilishqa bashlidi.
töwende seta-tashqi siyasetler tetqiqatchisi jan ajunning bu heqtiki analizini diqqitinglargha sunimiz...
térrorluq teshkilati p k k türkiyede térrorist kattibéshi abdullah öjalan teripidin 1970-yillirining otturilirida qurulghandin kéyin, süriye istixbarat idarisi bilen munasiwet ornitishqa we süriye ichide teshkilatlinip zoriyishqa bashlighan. beshshar esed hakimiyiti dada esed dewride liwandiki lagérlarda teshkilat ezalirini terbiyelep, türkiyege qarshi paydilinishqa urunghan. emma, türkiyening herbiy arilishishi netijiside, keynige chékinip, öjalan we bashqa térrorluq teshkilati ezaliri süriyedin chiqiriwétilgen. süriye inqilabining bashlinishi bilen teng, beshshar esed hakimiyiti qaytidin p k k din hem inqilabchi küchlerge hemde türkiyege qarshi paydilinish üchün teshkilatning süriyediki qurulmisi bolghan p y d|y p g bilen hemkarliqni kücheytip we nurghun rayonlardin chékinip chiqip, bu jaylarni térrorluq teshkilatigha tashlap bergen.
térrorluq teshkilati, beshshar esed hakimiyiti bilen nurghun sahelerde hemkarliqlirini tereqqiy qildurup, süriyening shimalidiki nurghun jaylarda hökümranliq ornigha ötti. arqidin térrorluq teshkilati daéshqa qarshi küreshte amérika bilen hemkarliship, hökümranliq jaylirini téximu kéngeytti. bolupmu, 2014-yilining otturiliridin tartip térrorluq teshkilati p y d|y p g amérikaning yardimi astida süriyening sherqiy shimalida keng jaylarni kontrolluqigha aldi. mesilen, raqqe, déyrizur qatarliq énérgiye menbeliri mol bolghan ereb rayonliridimu amérika eskerliri bilen birlikte hökümranliqini ornatti.
térrorluq teshkilatining meqsiti eslide, qolida tutup turuwatqan süriyediki afrin bilen sherqtiki rayonlarni birleshtürüp ilgirilesh we axirida sherqiy aqdéngizghiche peske chüshüp we déngizgha tutiship, bir aptonom rayon shekli arqiliq kichik dölettin birni qurush idi. biraq, türkiye 15-iyul herbiy isyanidin kéyinla deslepte firat qalqini herikiti, arqidin zeytun shéxi herikitini qozghap, bu pilanlarni bitchit qildi. kéyiche yene, tinchliq buliqi herikiti bilen firat deryasining sherqidiki tél abyad we resulaynni térrorluq teshkilatidin tazilap «p k k döliti» pilanini muweppeqiyetlik halda meghlub qildi.
türkiye bu mezgilde, amérika eskerlirinimu rayondin chiqardi. rusiye bilen beshshar esed küchliri firatning sherqidiki bezi rayonlargha orunlashti.
shundaq bolsimu, térrorluq teshkilati p y d|y p g firatning gherbidiki tél rifat we munbich rayonlirida, firatning sherqide ayn el araptin malikiyegiche, jenubta raqqe we déyrizurning bir qismida mewjutluqini saqlap kelmekte. türkiye bir tereptin, amérika we rusiyege bésim qilip, térrorluq teshkilatining tesirini azaytishqa tirishsa, yene bir tereptin, istixbarat idarisining muweppeqiyetlik heriketliri we uchquchisiz hawa apparatliri bilen térrorluq teshkilatigha zerbe bérip, teshkilatning atalmish namdiki kattibashlirini bir terep qildi. türkiye yene, rayonda yashawatqan kürt (kord) we ereblerni térrorluq teshkilatidin qoghdashqa we ularni toghra nishangha yüzlendürüshke tirishmaqta.
türkiye terepte térrorluq teshkilati yoqilish girdabigha keltürüldi. iraq terepte bolsa, muweppeqiyetlik herbiy heriketler arqiliq tar yerge qistaldi. süriye terepte bolsa, térrorluq teshkilati amérikaning qoghdishi astida mewjutluqini qoghdashqa urunuwatidu. türkiye her bir pursette süriyeningmu térrorluq teshkilatigha bixeter jay emeslikini bildürüp qoyush üchün, muweppeqiyetlik halda nishangha élishni dawamlashturmaqta.