erméniyening qoshna döletler bilen bolghan munasiwetliri

erméniyening qoshniliri bilen bolghan munasiwetliri

 abdresul ishaqow

2021-yili, 8-ayning 18-küni, erméniye bash ministiri nikol pashinyan, hökümitining 5 yilliq pilanini élan qilish bilen bir waqitta, diplomatiye siyasitide qoshniliri bilen qoyuq hemkarliqni tereqqiy qilduridighanliqlirini bildürdi. kéyin u bir téléwiziye qanilida bergen bayanatida, aldinqi shertsiz türkiye jumhuriyiti bilen bolghan munasiwetlerni normallashturushqa teyyar ikenlikini bayan qildi. nikol pashinyanning qarishiche, erméniye bilen türkiye otturisida diplomatik munasiwetlerning bolmasliqi, chégra éghizlirining taqaq bolushi, rayonning muqimliqi we tinchliqigha selbiy tesir körsetmekte iken.

bash ministir pashinyanning bundaq bayanat élan  qilishi tasadipiy otturigha chiqip qalghan ish emes. hemmeylenge ayan bolghinidek, nikol pashinyan gherb bilen yéqinlishish wedisi bilen hakimiyet béshigha chiqqanidi. gherb bilen yéqinlishish bolsa giruziye we türkiye bilen bolghan munasiwetlerni tereqqiy qildurushni teqezza qilidu. pashinyan rehberlikidiki heq telep kélishimi partiyesi, qoshniliri bilen yaxshi munasiwet ornitishni xalaydighanliqini aldin otturigha qoyuwatatti. omumiy saylam basquchida, nikol pashinyanning xizmet guruppisi türkiye bilen bolghan munasiwetlerni közdin kechüridighanliqlirini ochuq – ashkara halda bildürgenidi.

2021-yili, 6-ayning 20-küni ötküzülgen omumiy saylamda ghelbe qilghan hakimiyet béshidiki heq telep kélishimi partiyesining hökümet teshkillishi üchün ittipaqliq ornitishqa éhtiyaji chüshmesliki, nikol pashinyangha qoshna döletler bilen bolghan munasiwetlerni normallashturush pursiti yaritip bermekte. erméniye xelqi, qarabaghda meghlup bolghan bolushigha qarimay, pashinyanni hakimiyet béshigha chiqirish arqiliq, uning qoshnilar bilen bolghan munasiwetlerni eslige keltüridighanliqi toghrisidiki wedisini qollighanliqini namayen qildi, dep étishqa bolidu.

2021-yili, 8-ayning 2-küni, nikol pashinyan qaytidin bash ministir bolup saylandi. kéyinki künlerde, yéngi ichki kabinét ezaliri éniq boldi, tashqi ishlar ministiri eng axiri békitilgen shexs boldi. bash ministir nikol pashinyangha yéqinliqi bilen tonulghan ararat mirzoyan tashqi ishlar ministiri qilip teyinlengendin kéyin, beziler uni «u tégi diplomat shexs emes» dep tenqid qildi. bash ministir pashinyan tashqi siyasette bösüsh xaraktérlik qedemlerni tashlash üchün, sepdishi ararat mirzoyanni bu wezipige teyinligen bolushi mumkin. diplomatiye ministiri ararat mirzoyan türkiyeni yaxshi bilidighan we gherbni qollaydighan kishi dep bilinidu.

44 künlük qarabagh urushidin kéyin, rusiye, ezerbeyjan we erméniye qurghan üch terep komitéti, bir nechche ayliq muresseleshmeslik basquchidin kéyin qaytidin paaliyetlirini bashlidi. bu ehwal, pashinyan hökümitining qoshniliri bilen bolghan munasiwetlirini, bolupmu türkiye bilen bolghan munasiwetlirini normallashturushqa ijabiy qarashta ikenlikini körsitip béridu. bu üch terep komitéti, nurghun mesililer heqqide söhbet élip barmaqta. shuni tekitlesh hajetki, zéngézzur karidori layihesi, bu mesililerning eng muhimliridin biri hésablinidu.

erméniye siyasitide küchidin ayrilip qalghan qarabagh jemeti, pütün küchi bilen bu basquchni qalaymiqan qiliwétishke urunidu. emma biz erméniyening ichki siyasitide eqil - parasetning ghelibe qilidighanliqigha ishinimiz.

türkiye bilen ezerbeyjan ortaq teklip sunghan «rayonluq 6 tereplik munber» shekillendürüsh pilani munasiwetlik barliq tereplerge paydiliqtur. erméniyening tereqqiy qilishi qoshniliri bilen bolghan munasiwetlirini yaxshilashqa baghliqtur. türkiyening rusiye fédératsiyesi bilen bolghan mewjut munasiwetliri, jenubiy kawkaz rayonidiki hemkarliqning tereqqiyatigha uyghun zémin hazirlap bermekte. bu xil sewebler pashinyan hökümitini tashqi siyasette estayidil tedbir qollinishqa ilhamlandurghan bolushi mumkin.