allah ghalibtur, hékmet bilen ish qilghuchidur

türkiye awazi radiyosi: nehl sürisi, 55 – 64 - ayetler. ular özlirige bergen (béshidiki éghirchiliqni kötürüwetkenlikimizdin ibaret) némitimizge nashükürlük qilidu, (siler ejilinglar yetküche dunyadin) behrimen bolunglar, (ishinglarning aqiwitini) uzaqqa qalmay bilisiler[55]. ular biz özlirige bergen mal ـ mülüktin bilimsiz (butlargha) nésiwe qalduridu, (i mushriklar!) allahning nami bilen qesemki, siler özünglar oydurup chiqarghan nersenglar üchün choqum soraqqa tartilisiler[56]. ular allahqa qizlarni nisbet béridu, allah (bundaq bohtandin) paktur, ular özi arzu qilidighanlirini özlirige nisbet béridu[57]. ularning birersige (xotunining) qiz tughqanliq xosh xewiri yetküzülse, chirayi özgirip, ghezepnak bolup kétidu[58]. yetküzülgen yaman xewerdin qorqup, öz qewmige körünmey yoshurunuwalidu. andin u nomusqa chidap qizni saqlap qalamdu? yaki uni topa astigha (tirik) kömemdu? (shu heqte oylinidu) ularning hökmi (yeni oghullarni özlirige nisbet bérip, qizlarni allahqa nisbet bérishi) heqiqeten némidégen qebih![59] axiretke ishenmeydighanlar (oghulni yaxshi körüp, qizni yaman körüsh, xotuni oghul tughsa xushal bolup, qiz tughsa achchiqi kélish, ar ـ nomustin we kembeghelliktin qorqup, qizlarni tirik kömüshke oxshash) yaman süpetlerge ige, allah bolsa eng aliy xisletlerge ige, allah ghalibtur, hékmet bilen ish qilghuchidur[60]. eger allah insanlarni ularning zulmi tüpeylidin (chapsan) jazalaydighan bolsa, yer yüzide qimirlap turidighan héchbir jan igisini qoymighan bolatti, lékin allah ularni mueyyen waqitqiche texir qilidu, ularning (halak bolush) waqti kelgende qilche waqitmu kéchiktürülmeydu, (waqti kelmise) qilche waqitmu ilgiri sürülmeydu[61]. ular özliri yaman köridighanni allahqa mensup qilidu, ular aqiwitining yaxshi bolidighanliqi bilen jöylüydu, shübhisizki, ular dozax azabigha duchar bolidu, ular (dozaxta) tashlinip qalghuchilardur[62]. (i muhemmed!) allah nami bilen qesemki, sendin ilgiri ötken ümmetlerge heqiqeten (peyghemberler) ewettuq, sheytan ularning emellirini özlirige chirayliq körsetti, sheytan bügün ularning yardemchisidur. ular axirette qattiq azabqa duchar bolidu[63]. (i muhemmed!) biz kitabni (yeni quranni) peqet séning kishilerge ular (dinidiki) detalash qilishqan nersilerni bayan qilip bérishing üchün, iman éytidighan qewmge hidayet we rehmet bolsun üchünla nazil qilduq[64].