залимларниң қилмишлиридин аллаһни бихәвәр дәп ойлимиғин

түркийә авази радийоси: ибраһим сүриси, 36 – 43 айәтләр. пәрвәрдигарим! улар (йәни бутлар) нурғун кишиләрни аздурди, кимки маңа әгәшкән икән, у мениң динимдидур, кимки маңа асийлиқ қилған икән, сән әлвәттә (униңға) мәғпирәт қилишқа вә мәрһәмәт қилишқа (қадирсән)[36]. пәрвәрдигаримиз! әвладимниң бир қисимини (йәни балам исмаил билән айалим һаҗәрни) намаз оқусун (йәни саңа ибадәт қилсун дәп) сениң һөрмәтлик өйүңниң қешидики екинсиз бир вадиға (йәни мәккигә) орунлаштурдум, пәрвәрдигаримиз! бир қисим кишиләрниң диллирини уларға майил қилғин, уларни шүкүр қилсун дәп түрлүк мевиләрни уларға ризиқ қилип бәргин[37]. пәрвәрдигаримиз! сән бизниң йошурун вә ашкара қилғанлиримизни билип турисән, асман ـ земиндики һеч нәрсә аллаһқа мәхпий әмәс[38]. җими һәмдусана йашанғинимда маңа исмаил билән исһақни бәргән аллаһқа хастур! пәрвәрдигарим! һәқиқәтән дуани аңлап турғучидур (йәни дуа қилғучиниң дуасини иҗабәт қилғучидур)[39]. пәрвәрдигарим! мени вә бир қисим әвладимни намазни ада қилғучи қилғин, пәрвәрдигаримиз! дуайимни қобул қилғин[40]. пәрвәрдигаримиз! һесаб алидиған күндә (йәни қийамәт күнидә) маңа, ата ـ анамға вә мөминләргә мәғпирәт қилғин»[41]. залимларниң қилмишлиридин аллаһни бихәвәр дәп ойлимиғин, аллаһ уларни җазалашни (шу күниниң дәһшитидин) көзләр чәкчийип қалидиған күнигичә (йәни қийамәт күнигичә) кечиктүриду[42]. (бу күндә) улар башлирини көтүрүп, алға қарап чапиду, көзлири ечилип қалиду, (теңирқиғанлиқтин) диллири (әқил ـ идрактин) халий болуп қалиду[43].