chet ellik yazghuchilarning qelimidiki atatürk

türkiye jumhuriyitining qurghuchisi mustapa kamal atatürk toghrisida herxil tillarda nurghun kitablarning yézilghanliqini anglighanmidingiz?

1938- yili 11- ayning 10- küni wapat bolghan mustapa kamal atatürk türkiye jumhuriyitining eng muhim kishisidur. atatürk , yalghuz türkiyedila emes, dunyaning herqaysi jayliridimu muhim tesirlerni qaldurghan bolup, nurghun döletler uning ish - izlirini özlirige ülge qildi, nurghun tetqiqatchilar we yazghuchilar uning hayatini tetqiq qilip kitablarni yazdi.

bu kitablarning eng meshhurliri ichide engliye hökümiti teripidin atatürk heqqide terjimihal yézishqa teyinlengen lord kinros yazghan «atatürk - bir milletning qayta tughulushi» namliq eser aldinqi rettin orun alidu. birinchi neshri 1960 – yili élan qilinghan kitabta atatürkning xaraktér alahidiliki, osmanli impériyesining axirqi we türkiye jumhuriyitining deslepki yilliri teswirlinidu. yene bir engliyelik yazghuchi, tetqiqatchi andréw mangomu «atatürk - zamaniwi türkiyening qurghuchisi» namliq esiride, atatürkning hayatini herjehettin muhakime qilidu. yene amérikiliq herbiy yazghuchi ostin bayning «atatürk – zamaniwi türkiyening qurghuchisi dahi généralning lidérliqigha dair sawaqlar» namliq esiri, atatürkning lidérliqi we herbiylerge qomandanliq qilish qabiliyiti shundaqla herxil iqtidarliri nahayiti janliq teswirlengen bir terjimihaldur. türk tili we tarixi toghrisidiki tetqiqatliri bilen tonulghan klaus kréysérning «atatürk» namliq esiri bolsa, gérmaniyede köp qétim neshr qilinghan we oqughuchi - oqutquchilarning muhim menbesige aylanghan muhim eserlerning biri hésablinidu.