xulusi aqarning ottura asiya ziyariti

yawroasiyagha nezer - 45

1522240
xulusi aqarning ottura asiya ziyariti

öwende, «yawroasiyagha nezer» namliq pirogrammimizning bügünki bölümide, abdresul ishaqow teripidin teyyarlanghan «türkiye jumhuriyiti dölet mudapie ministiri xulusi aqarning ottura asiyaziyariti» témiliq analizni diqqitinglargha sunimiz.

türkiye jumhuriyiti dölet mudapie ministiri xulusi aqar, 2020-yili 10-ayning 25-künidin 28-künigiche pakistan, qazaqistan we özbékistanda dölet ishliri ziyaritide boldi. aqar 26-öktebir pakistandin qazaqistangha yétip bardi. qazaqistanda dölet mudapie ministiri nurlan yermekbayéw teripidin herbiy murasim arqiliq qarshi élinghan aqar, nursultan shehiride, qazaqistan bash ministiri esqer mermin  we sanaet we ul eslihe qurulushini tereqqiy qildurush ishliri ministiri beybut ataqulow, qazaqistan jumhuriyiti milliy muhapizetchiler qisimlirining qomandani ruslan jaksilikow bilen körüshti. uchrishishlarda, ikki terep munasiwetliri we rayonluq mesililer heqqide muzakire élip bérildi. shuni izahlash hajetki, türkiye bilen qazaqistan 2018-yili herbiy hemkarliq kélishimi imzalighanidi. türkiye – qazaqistan  mudapie sahesidiki munasiwetler  1990-yillarning bashliridin étibaren dawamlashmaqta.

27-öktebir küni, dölet mudapie ministiri aqar özbékistangha yétip bardi. aqar tashkente özbékistan dölet mudapie ministiri bahadir qurbanow teripidin resmiy murasim arqiliq qarshi élindi. ayrim we heyetler ara uchrishishlardin kéyin, türkiye bilen özbékistan dölet mudapie ministirliqliri otturisida «pul-muamile hemkarliqi kélishimi» we «neq pul yardem kélishim layihesi» imzalandi. aqar yene, özbékistan dölet bixeterlik kéngishining bash katipi wiktor mehmudow bilenmu körüshti. aqar axirida, özbékistan prézidénti shewket mirziyoyéw teripidin qobul qilindi.

dölet mudapie ministiri aqarning qarabaghda toqunushlar dawamlishiwatqan bir peytte élip barghan bu ziyariti, bir qanche jehettin muhim ehmiyetke ige.

aldinqi yili, özbékistan dölet mudapie ministiri qurbanow , qazaqistan dölet mudapie ministiri yermekbayéw bilen élip barghan uchrishishida, döletlirining hawa mudapiesini türkiye  bilen birlikte kücheytish teklipini sunghanidi. bu dairide, ottura asiya jumhuriyetlirining, türkiye ishlepchiqarghan zénit toplar, uchquchisiz hawa apparatliri we qoralliq uchquchisiz hawa apparatliri bilen teminlinishi nahayiti zor ehmiyetke ige.

türkiyening herbiy tejribe, iqtidar we téxnologiye jehettin sherqtiki qérindashliri bilen ortaqlishidighan nurghun nuqtilarning barliqi körülmekte. herbiy telim - terbiye, uchur - axbarat almashturush we mudapie sahesidiki hemkarliqni kücheytish, yéngi ewlad qoral – yaraghlarni sétiwélish we tor bixeterliki qatarliq sahelerde hemkarliq intayin muhim. shunga, bu sahede qoyuq hemkarliqni izchil dawamlashturush barliq tereplerge paydiliqtur.

2019-yili 4-ayning 22-künidin 27-künigiche özbékistanda türkiye we pakistan eskerlirining ishtirak qilishida «hemkarliq qalqini – 2019» herbiy manéwiri ötküzülgenidi. bu birleshme herbiy manéwirlarning dawamlishidighanliqi bildürülgenidi. bu dairide, aqarning ziyaritini pakistandin bashlishi nahayiti muhimdur.

yene bir tereptin, türkiye jumhuriyiti dölet mudapie ministiri xulusi aqarning shangxey hemkarliq teshkilatigha eza bu döletlerge qilghan ziyariti, enqerening köp yönilishlik diplomatiye siyasitigimu uyghundur. türkiyening ottura asiya jumhuriyetliri bilen bolghan herbiy-téxnika munasiwetliri nahayiti yaxshi bolup, bu munasiwetlerni istiratégiyelik sewiyege yetküzüshningmu del waqti yétip keldi, elwette. türkiyening ottura sherq, afriqa we kawkaz rayonidin kéyin, ottura asiya döletliri bilen bolghan mudapie hemkarliqi sahesidiki munasiwetlirini yéngi sewiyige yetküzüshni nishan qilishi؛ enqerening rayondiki nopuzining kücheytilishi, ittipaqdashliri bilen bolghan hemkarliqining mustehkemlinishi we qérindashliq qolining sunulushi jehettin nahayiti zor ehmiyetke ige.



مۇناسىۋەتلىك خەۋەرلەر