türksoy - özbékistan munasiwetliri

xelqara türk medeniyiti teshkilati türksoyning özbékistan bilen bolghan hemkarliqi heqqide.

1488055
türksoy - özbékistan munasiwetliri

2020 – yili 4 – séntebir küni xelqara türk medeniyiti teshkilati türksoy bilen özbékistan jumhuriyiti otturisidiki medeniyet munasiwiti mezmun qilinghan «türksoy-özbékistan kitabi» namliq eserni tonushturush meqsitide  téléwiziye - téléfon yighini chaqirildi. yighingha, türksoy bash katipi dusén kaséynow, özbékistan jumhuriyiti medeniyet ministiri ozodbék nazarbékow, türkiye jumhuriyiti jumhur reisi bash meslihetchisi yalchin topchu, bash elchiler, parlamént ezaliri we diplomatlar qatnashti. yighinda, özbékistan senetchilirining türksoyning paaliyetlirige qoshqan töhpisi we özbékistanning bu teshkilat bilen bolghan munasiwetliri muzakire qilindi.

türksoy qurulghan kündin tartip hazirghiche medeniyet saheside türk dunyasigha munasiwetlik yüzligen paaliyetlerni izchil dawamlashturup keldi. türk dunyasining UNESCO si bolghan türksoy, hem türk jumhuriyetliri otturisidiki medeniyet munasiwetlirining tereqqiy qilishida, hemde türk medeniyitini dunyagha tonushturushta muhim rol oynimaqta.

özbékistan jumhuriyiti 1993-yili 12 – iyul küni almuta shehiride türksoyning qurulush höjjitige imza qoyghan bu teshkilatqa eza döletlerning biri. lékin, özbékistanning sabiq prézidénti islam kerimow dewride meydangha kelgen bir qisim ixtilaplar tüpeylidin, türksoyning bash katibat bashqarmisida özbékistanning wekili yoqtur.

özbékistan pirézidénti shewket mirziyoyéw, 2018-yili 3 – séntebir küni chaqirilghan 6-nöwetlik tür kéngishi bashliqlar yighinida qilghan sözide, UNESCO  ning «dunya medeniyet mirasliri tizimliki» diki hiwe shehirini türk dunyasining medeniyet paytexti qilish teklipini otturigha qoyghanidi. bu teklip türk kéngishige eza döletlerning rehberliri teripidin qobul qilindi. shuning bilen, hiwe shehiri «2020-yilliq türk dunyasining medeniyet paytexti» élan qilindi. özbékistanning bu muhim teshebbusi ishqa ashurulghandin kéyin, özbékistan medeniyet ministirliqi türksoy bilen bolghan hemkarliqini kücheytti.

bu yerde shuni tekitlishimiz kérekki, gerche türksoy bash katibat bashqarmisida özbékistan wekili bolmisimu, emma bu teshkilat özbékistanliq senetchiler, ressamlar, binakarlar we edebiyatchilar qatarliq kespiy wekillerni özi uyushturghan paaliyetlerge hemishe teklip qilip keldi. türksoyning bash merkizide, elishir nawaiy we abdullah qadiri qatarliq özbékistanliq meshhur shexsler üchün konféranslar ötküzüldi. 2017-yili, özbékistan yazghuchisi shükrulla, türksoymu uyushturghuchilar qataridin orun alghan «türk dunyasi yilning edebiyat erbabi mukapati» gha layiqn körüldi. türksoy bash katipi dusén kasséynowmu hemishe tekitlep kéliwatqinidek, türksoy qurulghan kündin bashlap, türksoyning bash katibat bashqarmisida we barliq paaliyetliride özbékistan jumhuriyitining bayriqi lepilditilmekte.

yéqinqi özgirishlerdin shuni körüwélishqa boliduki, özbékistan türk kéngishige eza bolghandin kéyin, türksoy bilen aktip hemkarlishishqa bashlidi. türk dunyasining özbékistan medeniyiti, seniti we muhim shexslirini yéqindin bilishke éhtiyaji bardur. özbékistan wekilining türksoy bash katibat bashqarmisida eng qisqa waqit ichide wezipige olturup, bu sahediki paaliyetlerning süritini tézlitishke töhpe qoshushini ümid qilimiz.

buningdin bashqa, eger türksoyda neshir qilinghan eserler teshkilatqa eza we közetküchi 14 döletning tillirigha toluq terjime qilinsa, hemde bu eserlerning hemmisi torda élan qilinsa, türk dunyasining yéqinlishishi téximu tézlishidu. shundaqla, türksoy muhim orungha qoyup ishqa ashurup kéliwatqan paaliyetlerning netijisidin téximu köp kishi behrimen bolidu.



مۇناسىۋەتلىك خەۋەرلەر