türkiyening «wuxen wirusi» gha qarshi küreshte yawroasiya ellirige bériwatqan yardemliri

türkiyening «wuxen wirusi» gha qarshi küresh dairiside yawroasiya döletler bilen bolghan hemkarliqi we ulargha bériwatqan yardemliri.

1394539
türkiyening «wuxen wirusi» gha qarshi küreshte yawroasiya ellirige bériwatqan yardemliri

türkiye awazi radiyosi xewiri: «wuxen wirusi» pütkül dunyada tézlik bilen tarqalmaqta. bundaq halqiliq peytte dunyada xelqaraliq hemkarliqni aldinqi pilangha chiqirish nahayiti zor ehmiyetke ige. bu nuqtidin élip éytqanda, türkiye yolgha qoyuwatqan siyasetni xelqaraliq ülge déyishke bolidu. apréldin bashliridin étibaren türkiyedin yardem telep qilghan döletlerning sani 100 ge yéqinlashti. türkiyemu imkaniyetning bariche bu döletlerge  yardem qolini sunmaqta.

türkiye «wuxen wirusi» otturigha chiqqan deslepki künlerde xitaygha yardem bérish arqiliq, «wuxen wirusi» gha qarshi küreshte döletler ara hemkarliqning nahayiti muhim ikenlikini pütkül jahangha namayen qilghanidi. yéqindin buyan yawroasiya jughrapiyesiiki ellerdimu «wuxen wirusi» nahayiti téz tarqilishqa bashlidi. jümlidin türkiye bu döletlergimu izchil yardem bermekte.

2020 – yili 21 – mart küni bulghariye dölet mudapie ministiri krasimir karakachanow, «wuxen wirusi» ning tarqilinishining aldini élish matériyalliri mesiliside dölitige yawropaning emes, eksiche türkiyening yardem qilghanliqini bildürdi.

ezerbeyjan sehiye ministiri oktay shireliyéw, 25 – mart küni türkiyening yardimi arqiliq «wuxen wirusi» bimarlirini tekshürüp éniqlap chiqish xizmitini ishqa kirishtürgenliklirini éytti. ege uniwérsitéti 1 – aprél küni ezerbeyjanliq yardemchi ustazlar we mutexessislerge «wuxen wirusi» gha qarshi küresh toghruluq ikki heptilik kurs échilidighanliqini, andin ularning ezerbeyjangha ewetilidighanliqini bildürdi.

26 – mart küni türkiyening bishkék shehiride salghan qirghizistan – türkiye dostluq doxturxanisini «wuxen wirusi» gha qarshi küreshte ishlitilishi üchün qirghizistangha ötküzüp bergenliki jakarlandi.  türkiye hemkarliq we maslashturush idarisining bishkék ishxanisi aldinqi yili qirghizistanning batkén rayonluq doxturxanisi yuqumluq késellikler bölümini  rémunt qildurup bergenidi. nöwette, «wuxen wirusi» bilen yuqumlanghan 19 bimar mushu doxturxanida dawalanmaqta.

27 – mart küni wéngiriye tashqi ishlar ministiri, qoshumche tashqi soda ministiri pétér szijjarto, dölitining «wuxen wirusi» gha qarshi küresh tedbirliri dairiside türk kéngishidin yardem telep qilghanliqini, hemde türkiyening maska yasashta ishlitilidighan 8 tonna tuqulmining wéngiriyege éksport qilinishigha ruxset bergenlikini bildürdi.

31 – mart küni merkizi enqerediki bir qurulush shirkiti qazaqistangha «wuxen wirusi» gha qarshi küresh dairiside 1000 dane dawalash üsküinisi ewetti. yawroasiya jughrapiyeside paaliyet élip bériwatqan türk shirketliri yerlik hökümetler  we xelqlerlge qolliridin kélishiche yardem bérishke tirishmaqta.

1 – aprél küni jumhur reis rejep tayyip erdoghan rusiye pirézidénti wiladimir putin bilen téléfonda körüshüp, «wuxen wirusi» gha qarshi küresh mesiliside hemkarlishish toghruluq muzakire élip bardi.  shu küni erdoghan yene,  ukraina pirézidénti wladimir zéléniski bilen téléfonda körüshti. téléfon söhbitide, zéléniski türkiyedin nepeslinish üskünisi we mexsus qoghdinish kiyimi yardem bérishini telep qildi.

2 – aprél küni musteqil soda - sanaetchiler we karxanichilar jemiyitining tiflis ishxanisi bilen türkiye – giruziye soda - sanaetchiler jemiyitining ezaliri, türkiyening tiflis elchixanisining  riyasetchilikide 200 ailige yémek - ichmek we taziliq buyumliri yardem qildi. dölette paaliyet élip bériwatqan türk soda - sanaetchiler giruziye hökümitining «wuxen wirusi» gha qarshi küresh yardem fondigha köp miqdarda pul iane qildi. türkiye hemkarliq we maslashturush idarisi aldinqi yili batum  yuqumluq késellikler doxturxanisini rémunt qildurup, giruziyege tapshurup bergenidi.

rayon döletlirige dawalash üsküniliri yardem bériwatqan türkiye hemkarliq we maslashturush idarisining, 2018 - yili  tajikistandiki tursunzade yuqumluq késellikler doxturxanisining balilar késellikliri bölümini rémunt qildurup bergenlikini, shuning bilen bir waqitta, doxturxanining 3 – qewitige 33 yataqliq balilar yuqumluq késellikler  bölümi tesis qilip bergenlikinimu alahide eskertip ötüshke toghra kélidu.

türkiye öz döletlirige qaytalmighan chet ellik oqughuchilarghimu sahib chiqmaqta. eng axirqi qétim türkiyediki soda – sanaetchilerningmu yardem bérishi astida 300 din köp qazaq oqughuchi öz yurtigha qayturuldi.



مۇناسىۋەتلىك خەۋەرلەر