rewani» étish usuli heqqide

türkiye awazi radiyosi: tatliq – turumlar katégoriyesige kiridighan «rewani», osmanli impériyesi ordusi ashxanisidiki bezi tamaqlargha oxshashla untulup qalghini yoq. bu taam hazirmu ashxanilarda we öylerde étilidu we yaqturulup, istémal qilinidu. «rewani» ning otturigha chiqishi heqqide mundaq bir riwayet bar. 17 – esirde sultan 4 – murat erméniyening eriwan shehirini pethi qilidu. osmanli impériyesi ordusi ashxanisining ashpezliri bu zeperni tebriklesh üchün, shu küngiche héch étilip baqmighan bir taamni étidu. bu taamning ismi shu dewrde eriwanning ismi bolghan «rewan» kelimisidin türlinidu. osmanli impériyesi ordusi ashxanisidin yadikar qalghan «rewani» türkiyening bezi rayonlirida «sünger tatliqi» yaki» «qétiq tatliqi» depmu atilidu. bügünki pirogrammimizda, osmanli impériyesi taamliridin «rewani» étish usuli heqqide melumat bérimiz.

osmanli impériyesi taamliridin «rewani» étish üchün kéreklik bolghan matériyallar töwendikiche:

• 4 dane tuxum
• bir istakan shéker
• bir istakan qétiq
• bir istakan yagh
• bir istakan  képeklik un
• ikki istakan un
• bir bolaq échitqu
• bir dane limonning rendilengen shöpüki
• 5 istakan su
• yérim limon süyi
• ikki qoshuq kokus yangiqi

osmanli impériyesi taamliridin «rewani» étish usuli töwendikiche:

• aldi bilen, tatliqning sherbitini teyyarlash üchün؛ shéker bilen suni bir qazangha séling, andin, töwen sewiyediki otta texminen 30 minut etrapida qayniting, arqidin, limon süyini ilawe  qilip, illiq halgha kélishi üchün qazandin éling.
• tuxum bilen shékerni arilashturghuchning yardimi bilen shéker taki érigenge qeder arilashturung.
• nöwet bilen, yaghni, qétiqni, yalpuzni, rendilengen limonning shöpükini, képeklik unni, elgektin ötküzülgen unni we échitquni ilawe qilghandin kéyin, arilashturushni dawamlashturung.
• doxupkini séiq may bilen yaghlang we xémirni qachigha töküng.
• aldin issitilghan 180 giradusliq doxupkida 30 minuttek pishurung.
• doxupkidin chiqqan issiq tortning üstige soghughan sherbetni töküng. sherbet tortqa tamamen singgendin kéyin, tortni tiling.
• üstige rendilengen kokus yangiqini sépip, istémal qilsingiz bolidu.