сулуқ көфтә

түркийә авази радийоси: түрк таамлириниң ваз кечилмәс ләззәтлиридин бири «сулуқ көфтә» дур. қийилған гөшниң дора – дәрманлар билән арилаштурулуп пишурулуши билән оттуриға чиқидиған көфтиниң түркийәдә 300 гә йеқин түри бар, дәп қарилиду. һәрбир районниң дегүдәк өзигә хас исми билән атилидиған көфтиси бар, десәк һәргизму көптүрүвәткән болмаймиз. бүгүн силәргә, анадолуниң ләззәтлик таамлиридин бири болған, һәм һәммә өйләрдә етилидиған, һәм барлиқ ресторанлар – ашханиларниң тамақ тизимликидин орун алидиған «сулуқ көфтә» һәққидә мәлумат беримиз.

«сулуқ көфтә» етиш үчүн керәклик болған материйаллар төвәндикичә:

•        300 гирам қийма

•        бир данә кичик тоғралған пийаз

•        1 – 2 чиш езилгән самсақ

•        бир қошуқ инчикә парчиланған булгур

•        бир татлиқ қошуқи туз

•        йерим татлиқ қошуқи қаримуч

•        йерим татлиқ қошуқи қизилмуч

•        йерим татлиқ қошуқи зирә

•        икки данә төт часа қилип тоғралған бәрәңгә

•        икки қошуқ ун

•        икки қошуқ пәмидур қийами

         «сулуқ көфтә» етиш усули төвәндикичә:

•        алди билән, қийминиң үстигә булгур, езилгән самсақ, дора – дәрман вә тузни илавә қилип, обдан йоғуруң, андин, йоғурулған қиймини 15 минут дәм йатқузуң, арқидин қиймидин кичик парчиларни елип, алқиниңизда йумилақлап, икки сантиметирдәк кичик парчилар һалитидә түгүп, комилачлаң.

•        унни чоң бир легәнгә төкүң.

•        көфтә комилачлирини легәнниң үстигә селиң, легәнни пулаңлитип, унниң барлиқ көфтиләргә арилишишини ишқа ашуруң.

•        андин чоң бир қазанда кичик тоғралған пийазларни йағда 3 – 4 минут қоруң.

•        йумшиған пийазларға пәмидур қийами, туз вә төт часа қилип тоғралған бәрәңгиләрни илавә қилип, йәнә икки минут қорушни давалаштуруң.

•        арқидин қазанға қайнақ су илавә қилип, бәрәңгиләрниң бираз йумшиши үчүн 10 минут пишуруң.

•        йерим һаләттә пишқан бәрәңгиләрниң үстигә унланған көфтә комилачлирини илавә қилиң.

•        қазанниң тувиқини йепип, отни пәсәйткәндин кейин, йәнә 15 минуттәк пишуруң.

•        тамақ тәййар болғандин кейин, үстигә қуруқ чөл рәйһини йаки қуруқ пиннә сепип, истемал қилсиңиз болиду.