شىمالىي ئامېرىكادا كۈن تۇتۇلدى

تۈركىيە ئاۋازى رادىيوسى خەۋىرى: مېكسىكانىڭ مازاتلان شەھىرىدە 8-ئاپرېل (2024) شۇ يەر ۋاقتى 11 دىن 7 مىنۇت ئۆتكەندە باشلانغان كۈن تۇتۇلۇش ھادىسىسى، ئامېرىكانىڭ شەرقىي شىمالىغا قاراپ ئىلگىرىلەپ، كانادادا 17 دىن 16 مىنۇت ئۆتكەندە ئاخىرلاشتى.

ئامېرىكادا 13 ئىشتاتتىكى يۈزلىگەن شەھەر ۋە بازارلاردا مىليونلىغان كىشى كۈن تۇتۇلۇشنى ئالاھىدە كۆزەينەك ھەمدە تېلېسكوپلار بىلەن كۆزەتتى. كۈننىڭ تولۇق تۇتۇلۇشى 6 مىڭ 437 كىلومېتىر ئۇزۇنلۇقتا، تەخمىنەن 44 مىليون نوپۇس ياشايدىغان ئامېرىكا، كانادا ۋە مېكسىكا زېمىنلىرىدا 186 كىلومېتىر كەڭلىكتىكى لىنيەدە كۆرۈلدى. بۇنىڭ سىرتىدا كۈن تۇتۇلۇش قىسمەن كۆرۈلدى.

مىليونلىغان كىشىلەر ئاي شارى ئايلىنىپ قوياش بىلەن يەرشارىنىڭ ئوتتۇرىسىغا كەلگەندە، قوياشنىڭ كۆپ قىسىمىنى ئاي شارى توسۇۋالغاندا يۈز بېرىدىغان كۈن تۇتۇلۇش ھادىسىسىنى كۆرۈش ئۈچۈن، بولۇپمۇ تولۇق كۈن تۇتۇلۇش كۆرۈلىدىغان رايونلارغا سەل بولۇپ ئاقتى.

2024-يىلنىڭ ئىككىنچى كۈن تۇتۇلۇشى 2-ئۆكتەبىر چىلى ۋە ئارگېنتىنانىڭ جەنۇبىدا يۈز بېرىدۇ. ئامېرىكادا كېلەر قېتىم 2044-يىلى تولۇق كۈن تۇتۇلىدۇ.

شىمالىي يېرىم شاردا 2021-يىلى 10-ئىيۇن ئاسترونوملار «ئوت چەمبىرى» دەپ ئاتايدىغان كۈن تۇتۇلۇش ھادىسىسى يۈز بەرگەن ئىدى.